అనూష గుర్రాలఓ తల్లి తన బిడ్డల ఆకలి ముందు నిలబడి
తన గర్భాన్నే త్యాగం చేసిన క్షణం
ఆమె కళ్లలో నీరు లేదు,
కేవలం నిశ్శబ్దం.
బతుకు అనే ఒప్పందం ఆమెను మోసం చేసింది;
తల్లి ప్రేమ కాదు ఇది బలవంతపు నిర్ణయం.
ఆమె లోపల ఖాళీ అయినప్పుడు ప్రపంచం కూలిపోయింది,
ఆ రోజు దేశం తన మనసు కోల్పోయింది.
చెరకు పొలాల్లో ఉదయం తీపి వాసన
కానీ ఆ తీపిలో రక్తపు గాఢత ఉంది
ప్రతి కట్టలో ఒక కథ దాగి ఉంది
ప్రతి చుక్కలో ఒక నిశ్శబ్దం దాగి ఉంది.
మనం తాగేది రసం అనుకుంటాం
కానీ అది శరీరాలు కార్చిన గాథ
ఆ తీపి వెనుక బాధ ఎవరు చూస్తారు?
శ్రమ అంటే చెమట చిందించడం మాత్రమే కాదు
ఇక్కడ శరీరమే ఒప్పందంగా మారింది.
గర్భాన్ని తీసేసి పని కొనసాగించడం
ఎంత క్రూరమైన సాధారణం అయ్యింది!
ఇది చికిత్స కాదు చీలిక…
ఇది లాభాల కోసం చేసిన నరికివేత,
జీవితం మీద జీవితం పెట్టిన తీర్పు.
బీడ్ అనే పేరు ఒక జిల్లాకాదు
ఇది ఖాళీ గర్భాల గాయాల భూమి
అక్కడ స్త్రీలు ఇంకా నవ్వుతారు బయటకి
కానీ లోపల ఒక నిశ్శబ్దమైన గుంట ఉంది.
జీవాన్ని మోసే స్థలం లేకుండా పోయింది
శరీరం మిగిలింది, ప్రపంచం పోయింది.
ఈ ఖాళీని ఎవరు నింపగలరు?
లాభం కోసం జీవితం యంత్రంగా మారింది
యంత్రానికి గుండె అవసరం లేదు
అదే విధంగా గర్భం కూడా అవసరం లేదు
అందుకే మా గర్భాలు తీసేశారు
పని ఆగకూడదనే పేరుతో
మా అస్తిత్వాన్ని తుడిచేశారు
మమ్మల్ని కేవలం పనిగా మిగిల్చేశారు
మహిళా దినోత్సవం ఒక వేడుక మాత్రమే
మా జీవితాల్లో అది ఒక ప్రశ్న
సాధికారత మాటల్లో మాత్రమే కనిపిస్తుంది
పొలాల్లో అది కనిపించదు ఎక్కడా
“స్త్రీ దేవత” అని పిలిచే సమాజం
ఆమె గర్భాన్ని ఎందుకు గౌరవించలేదు?
ఈ విరోధాన్ని ఎవరు అర్థం చేసుకుంటారు?
ఇప్పుడు మేము అరవడం లేదు గట్టిగా
ఎందుకంటే మౌనం కూడా ఒక శబ్దం
మా ఖాళీ గర్భాలు సాక్ష్యాలు
మా శరీరాలు కథలు చెబుతున్నాయి
ఈ దేశం మర్చిపోయిన నిజం మేమే
చరిత్ర మళ్లీ మమ్మల్ని గుర్తుంచుకుంటుంది
మా నిశ్శబ్దమే ఒక రోజు తీర్పు అవుతుంది.
మా ఖాళీ గర్భాలు
మీ అభివృద్ధి గణాంకాల్లో కనిపించవు,
కానీ చరిత్ర పేజీలపై రక్తమచ్చలుగా నిలిచిపోతాయి.
*
మహారాష్ట్రలోని బీడ్ జిల్లాలో చెరుకు కోత కూలీలుగా వలస వెళ్తున్న పేద మహిళలు కఠినమైన ఒప్పందాల కింద పని చేయాల్సి వచ్చేది ఒక్క రోజు పని మిస్ అయితే భారీ జరిమానా విధించే పరిస్థితిలో, నెలసరి నొప్పులు లేదా ఆరోగ్య సమస్యల వల్ల పని ఆగిపోకుండా ఉండేందుకు, కాంట్రాక్టర్ల ఒత్తిడి మరియు బ్రెయిన్వాష్ కారణంగా చాలా మంది మహిళలు తక్కువ వయసులోనే గర్భాశయాలను తొలగించుకునే పరిస్థితి ఏర్పడింది; ఇదే సమయంలో కొన్ని ప్రైవేట్ వైద్యులు చిన్న సమస్యలకే భయపెట్టి అనవసర హిస్టెరెక్టమీ ఆపరేషన్లు చేసి వారిని ఆర్థికంగా, శారీరకంగా, మానసికంగా దోపిడీ చేశారు—దీంతో ఈ ఘటన కేవలం ఆరోగ్య సమస్యగా కాకుండా పేదరికం, కార్మిక దోపిడీ, మరియు వ్యవస్థ వైఫల్యం కలిసిన ఒక తీవ్రమైన సామాజిక విషాదంగా నిలిచింది.
చిత్రం: సృజన్ రాజ్
పెద్దన్న
అవినేని భాస్కర్
సుంకర గోపాలయ్య
విన్నకోట రవిశంకర్
గీతా వెల్లంకి
రాజారామ్ తూముచర్ల
శ్రీనివాస్ గౌడ్
Add comment