అతను – నేను – ప్రేమ

అతణ్ని నేను ప్రేమించాను. మొదటి చూపులోనే చాలా ఇష్టంగా, పిచ్చిగా ప్రేమించాను. లవ్ ఎట్ ఫస్ట్ సైట్ మీద మీకు నమ్మకం లేకపోవచ్చు. అతణ్ని చూసేవరకూ నాకూ లేదు. చూశాక ఉన్నట్టుండి ప్రేమ పుట్టింది. ఇదంతా ఆకర్షణ అని కొట్టి పారేయకండి. అతనికంటే అందమైన, చురుకైన వాళ్లని చాలా మందిని చూశాను. ఎప్పుడూ కలగని ఫీలింగ్ అతడి దగ్గరే మొదలైంది.

అతనికి ఉద్యోగం కొత్త కాదు. మా ఆఫీసు కొత్త. అక్కడ పని కొత్త. పెద్దగా ఎవరితో మాట్లాడేవాడు కాదు. కళ్లలో ఒకలాంటి నిర్లక్ష్యం. వాటిలో బలంగా కనిపించే ఆత్మవిశ్వాసం. అందగాడేలే అనిపించే రూపం. అమ్మాయిల కలల రాకుమారుడయ్యేంత అవకాశం లేని సాదాసీదాతనం.

ఆఫీసులో తను చేరిన రెండో రోజు ‘హాయ్’ అని పలకరిస్తే కొంత ఆశ్చర్యం, కాస్త బెరుకు నిండిన గొంతుతో ‘హాయ్ సర్!’ అన్నాడు. అక్కడ అతనికన్నా పైస్థాయి నాది. ‘యూ కెన్ కాల్ మీ విత్ మై నేమ్’ అంటూ పేరు చెప్పాను. నమ్మకంగా నవ్వి సరేనన్నాడు. పల్లెటూరి అబ్బాయి. వ్యవసాయం చేసే కుటుంబం. ఒక్కడే కొడుకు. ఇద్దరు అక్కలు. అక్కడక్కడా చిన్న చిన్న ఉద్యోగాలు చేశాక, ట్రైనింగ్ తీసుకుని ఇక్కడ జాయిన్ అయ్యాడు. తన గురించి ఏం విన్నా నచ్చేస్తుంది. ఇంకా ఇంకా తెలుసుకోవాలనిపిస్తుంది. తనను చూడాలని ప్రతి అరగంటకోసారి నా సీట్లోంచి లేచి తనున్న చోట అటూఇటూ తిరిగేవాన్ని. చూస్తే పలకరింపుగా నవ్వేవాడు. తను చూడనప్పుడు నాలో నేను నవ్వుకుంటూ వచ్చి నా సీట్లో కూర్చునేవాణ్ని.

నాలుగు వారాలు.. ఆ తర్వాత నాలుగు నెలలూ గడిచాయి. ఆ మధ్యలోని కాలమంతా అతనికి దగ్గరయ్యాను. ఆఫీసు అయిపోగానే అతణ్ని నా బైక్ మీదే హాస్టల్ దగ్గర దింపుతున్నాను. రాత్రుళ్లు ఏమీ తోచనప్పుడు ఛాటింగ్ చేస్తున్నాను. అతను రెండు మూడు రోజులు లీవ్ పెడితే ఆఫీసులో ఉండాలనిపించేది కాదు. అతని దగ్గరికి వెళ్లిపోవాలనిపించేది. అతనికి దగ్గరవుతూ ఉన్నాను. అతనూ ఆ దగ్గరితనం ఫీలవుతున్నట్టే అనిపించేది‌. మళ్లీ ఎక్కడో దూరంగా​ జరిగిపోతున్నట్లూ ఉండేది.

రెండు రోజుల క్రితం సడన్‌గా అడిగాడు.

‘మీరెవరినైనా ప్రేమించారా?’

ఇదే సరైన టైం‌.. చెప్పేద్దామా అనిపించింది. అయినా నాలుక చివరి దాకా వచ్చిన మాటల్ని బలవంతంగా ఆపేశాను. అప్పుడేమీ చెప్పకుండా మాట దాటేశాను. రూంకొచ్చి ఆలోచిస్తే చాలా ప్రశ్నలు కనిపించాయి. ఇదంతా కుదురుతుందా? అతను ఒప్పుకుంటాడా? ఇద్దరు మగాళ్ల మధ్య లవ్ ఏంటని అసహ్యంతో ఉద్యోగం మానేసి వెళ్లిపోతాడా? ఏం చేస్తాడు?

రెండు రోజులూ ఈ ఆలోచనలతో నరకం చూశా. ఆఫీసుకి వెళ్లలేదు. అతను కాల్ చేసినా కట్ చేశా. అతని గొంతు వింటే ఏడ్చేస్తానని అనిపించింది. బాగా ఆలోచించి ఒక నిర్ణయానికి వచ్చా. నేను పిరికివాన్ని కాదు. నా ప్రేమెందుకు పిరికిదై లోలోపలే ఆగిపోవాలి? చెప్పేయాలి. నాలో ఉన్నదంతా, నాకు తన మీద ఉన్నదంతా చెప్పేయాలి. దానికి అతనే పేరన్నా పెట్టనీ, ఎంతగానైనా అసహ్యించుకోనీ, నా ప్రేమ నా లోపలే చచ్చిపోయి లాభం లేదు. అతనికి చేరాలి. గెలుపో, ఓటమో.. ఏదో ఒకటి సాధించాలి.

ఇప్పుడు అతని దగ్గరికే వెళ్తున్నా! ఇదంతా ఎందుకు చెప్తున్నానంటే మీరూ ఇలా ఎవర్నైనా ప్రేమిస్తే ఆ దాన్ని లోపలే చంపేయకండి. చెప్పేయండి. ప్రేమ పేరుతో హత్యలు చేసే దారుణాలు చూస్తున్నాం. అలాంటిది మన ప్రేమను బతికించుకోవడం కోసం ఒక ప్రయత్నం చేయలేమా??

*