కలలు కనలేని వారి కోసం ఓ రంగుల కల

కళ అనేది మానవ ఆత్మకు ప్రతిరూపం. ఒక చిత్రకారుడు తన ఊహలను కాన్వాస్ మీద పరుస్తున్నప్పుడు, అది కేవలం రంగుల కలయిక మాత్రమే కాదు, అది ఒక నిశ్శబ్ద భాష. ప్రపంచవ్యాప్తంగా కళాకారులు రకరకాల వేదికల ద్వారా తమ ప్రతిభను చాటుకుంటారు.

కొందరు తమ గదుల్లో ఏకాంతంగా అద్భుతాలను సృష్టిస్తే, మరికొందరు గ్యాలరీల ద్వారా కళను ప్రపంచానికి పరిచయం చేస్తారు. ఈ ప్రతి ప్రయత్నం వెనుక అంకితభావం ఉంటుంది. అయితే, కళను కేవలం ప్రదర్శన వస్తువుగా కాకుండా, సామాజిక మార్పుకు ఒక సాధనంగా మలిచిన అరుదైన వ్యక్తిత్వాలలో రూబుల్ నేగి ఒకరు. ఆమె ప్రయాణం ఒక కళాకారిణిగా మొదలై, లక్షలాది మంది జీవితాల్లో వెలుగులు నింపే ఒక సామాజిక యోధగా కొనసాగుతోంది.

రూబుల్ నేగి ఈ మార్గాన్ని ఎంచుకోవడానికి వెనుక లోతైన మానవీయ కోణం ఉంది. ఒకసారి మురికివాడల్లోని పిల్లలను కలిసినప్పుడు, వారి పరిసరాల్లో ఉన్న చీకటి, నిరాశ ఆమెను తీవ్రంగా కలిచివేసింది. ముఖ్యంగా ‘మిశాల్ ముంబై’ ప్రాజెక్ట్ ప్రారంభానికి ముందు ఆమె ముంబైలోని మురికివాడల దుస్థితిని గమనించారు. ఆ ప్రాంతాల్లోని వెలిసిపోయిన గోడలు, మురికి గల్లీలు అక్కడ నివసించే వారి ఆత్మవిశ్వాసాన్ని దెబ్బతీస్తాయని ఆమె గ్రహించారు. ఆ క్షణంలో కలిగిన భావోద్వేగమే ఆమెను వీధుల్లోకి నడిపించింది. తన చేతిలోని బ్రష్‌కు సమాజపు గాయాలను మాన్పే శక్తి ఉందని ఆమె బలంగా నమ్మారు. ఈ సహానుభూతే వేల ఇళ్లకు రంగులు అద్దే ఒక బృహత్తర యజ్ఞానికి పునాది వేసింది.

మిశాల్ ముంబై అనేది కేవలం గోడలకు రంగులు వేసే కార్యక్రమం మాత్రమే కాదు. దీని ద్వారా రూబుల్ నేగి గారు మురికివాడలను ‘స్లమ్స్’ అని పిలిచే పద్ధతిని మార్చి, వాటిని ‘కలర్ ఫుల్ విలేజెస్’గా తీర్చిదిద్దారు. ముంబైలోని ధారావి, బాంద్రా వంటి ప్రాంతాల్లో దాదాపు 1,50,000 కంటే ఎక్కువ ఇళ్లకు ప్రకాశవంతమైన రంగులు వేశారు. ఈ ప్రాజెక్ట్ కింద ఇళ్లకు రంగులు వేయడమే కాకుండా, వర్షాకాలంలో ఇబ్బంది కలగకుండా వాటర్ ప్రూఫింగ్ సౌకర్యాన్ని కూడా కల్పించారు. ప్రతి ఇంటి గోడ మీద ఒక అందమైన పెయింటింగ్ లేదా స్ఫూర్తినిచ్చే చిత్రం ఉండటం వల్ల, అక్కడ నివసించే వారిలో ఒక తెలియని సంతోషం నెలకొంది. ఈ మార్పు వల్ల ఆ ప్రాంతాల్లో పారిశుధ్యం పట్ల అవగాహన పెరగడమే కాకుండా, ప్రజలు తమ పరిసరాలను స్వచ్ఛంగా ఉంచుకోవడం ప్రారంభించారు.

గ్లోబల్ పెర్స్పెక్టివ్ నుండి చూస్తే, అభివృద్ధి చెందిన దేశాల్లో పబ్లిక్ ఆర్ట్ అనేది ప్రజల మానసిక స్థితిని మెరుగుపరచడానికి ఒక థెరపీలా ఉపయోగపడుతుంది. రూబుల్ నేగి గారు సరిగ్గా అదే కాన్సెప్ట్‌ను భారతదేశంలోని సామాన్య ప్రజల చెంతకు తీసుకువచ్చారు. ‘Rouble Nagi Art  Foundation’ ద్వారా సాగుతున్న మిశాల్ ముంబై కేవలం అందం కోసం కాదు, అది అక్కడి ప్రజల జీవన ప్రమాణాలను పెంచడం కోసం. రంగులు వేయడంతో పాటు, అక్కడ ఉండే యువతకు, మహిళలకు వృత్తి విద్యా కోర్సుల్లో ట్రైనింగ్ ఇచ్చి వారు సొంతంగా ఉపాధి పొందేలా చేయడం ఈ ప్రాజెక్ట్ లోని మరో ముఖ్య భాగం. దీనివల్ల ఆర్ట్ అనేది ఒక ఎకనామిక్ సపోర్ట్ గా కూడా మారింది.

ఆమె చేస్తున్న ఈ అద్భుతమైన సేవకు అంతర్జాతీయ స్థాయిలో గుర్తింపు లభించింది. ఆమెకు ‘International Women’s Day Award’,  ‘Jijabai Women Achievers  Award’ వంటి ప్రతిష్టాత్మక పురస్కారాలు లభించాయి. ముఖ్యంగా కశ్మీర్ వంటి సున్నితమైన ప్రాంతాల్లో యువతను హింసకు దూరంగా ఉంచి, కళ వైపు మళ్లించడానికి ఆమె చేసిన ‘Art for Peace’ కార్యక్రమం గ్లోబల్ లెవల్లో ప్రశంసలు అందుకుంది. ఫోర్బ్స్ వంటి అంతర్జాతీయ పత్రికలు ఆమెను ఒక ఇన్ ఫ్లూయెన్సర్ గా గుర్తించాయి. అవార్డులు ఎన్ని వచ్చినా, ఆమె ఎప్పుడూ వినమ్రతతోనే ఉంటారు. ఒక పేదవాడి ముఖంలో కనిపించే ఆనందం కంటే మించిన అవార్డు మరొకటి లేదని ఆమె తరచుగా చెబుతుంటారు.

చెప్పాలంటే,రూబుల్ నేగి ఒక గొప్ప మార్పుకు నాంది పలికారు. ప్రపంచం అంటే కేవలం మనం చూసే అందమైన దృశ్యాలే  కాదు, మన కంటికి కనిపించని చీకటి మూలల్లో కూడా రంగులు నింపడమే నిజమైన మానవత్వం అని ఆమె నిరూపించారు. మిశాల్ ముంబై ద్వారా ఆమె సృష్టించిన వెల్లువ ఇప్పుడు ఇతర నగరాలకు కూడా విస్తరిస్తోంది. కళాకారులు ఎక్కడ ఉన్నా, ఏ మాధ్యమంలో పనిచేస్తున్నా, వారి అంతిమ లక్ష్యం సమాజాన్ని బాగుచేయడమే కావాలి.

*