నీలి నీలి ఆకాశం ఇద్దామనుకున్నా …

ఈ రచయిత ఎందుకో ఆకాశాన్ని తన పాటల్లో చూసుకొని మురిసిపోతుంటాడు. వాస్తవంగా ఆకాశాన్ని మెటాఫర్ గా ఊహించుకోని కవి ఎవరు ఉండరు. ఓ పాటలో ఆకాశం అమ్మాయైతే నీలా ఉంటుందే అంటాడు.ఇప్పుడు నేను పరిచయం చేయపోయే పాటలో నీలినీలి ఆకాశం అంటున్నాడు.ఇలా ఎన్నో అలంకారాలను తన పాటల్లో ప్రవేశపెట్టి,ఇంకా ప్రవేశ పెడుతూ అలుపులేకుండా ముందుకు సాగుతున్న పాటలపూదోట అతను.”నీ నవ్వుల తెల్లదనాన్ని నాగమల్లి అప్పడిగింది” అనే పాటకు నంది అవార్డు పొందిన రచయిత. ఎవరో కాదు మనందరికి సుపరిచితుడైన చంద్రబోస్.ఉమ్మడి వరంగల్ జిల్లా చిట్యాల మండలం చల్లగరిగె వాస్తవ్యులు.తాజ్ మహల్ సినిమాలోని “మంచుకొండల్లోని చంద్రమా” అనే పాటతో సినీరంగప్రవేశం చేశారు.ఆయన రచించిన పాట నీలి నీలి ఆకాశాన్ని ఈ వ్యాసంలో పరిచయం చేస్తున్నాను.

అసలు ఆకాశం నీలిరంగులో ఉంటుందా?ఉంటే ఎప్పుడు ఉంటుంది?ఎందుకు ప్రేయసికీ ఇద్దామనుకుంటాడు ?మళ్ళీ ఎందుకు వద్దనుకుంటాడు
అనే విషయాలను చూస్తే ఆకాశం నీలిరంగులోకి మారటానికి గల కారణం సూర్యకిరణాలు పరావర్తనం చెందటం.అదికూడా వాతావరణంలో కిరణాలు ప్రయాణం చేసే దాన్ని బట్టి ఆకాశం రకరకాల రంగుల్లోకి మారుతుంది.సూర్యుడు నడినెత్తి మీదకు వచ్చినప్పుడు ఆకాశం నీలిరంగులోకి మారుతుంది.వాస్తవంగా ఏ ప్రేమికుడైనా మొదటగా ప్రకృతిని తన సొంతంగా భావిస్తాడు.అలానే ఈ ప్రేమికుడు నీలి ఆకాశాన్ని తనలోకి ఒంపుకున్నాడు.నింగిని,నీరును,నేలను,చెట్లను సమాదరిస్తాడు.ఆకాశంలో ఉన్న నిగూఢార్థం “విశాలత”.

అంతటి గొప్ప హృదయాన్ని ఆవిష్కరించేవైపుకు రచయిత ఆ వాక్యాలను పాటకు తొడగవచ్చు. ఆకాశానికి సూర్యకిరణాలకు మధ్య  మబ్బులు  అడ్డొచ్చినప్పుడే నీలిరంగులోకి మారుతుంది ఆకాశం. ఇంతలా నేను ఆకాశాన్ని తీసుకవచ్చి ప్రేయసికి ఇస్తే ఆమె కానరాకుండా ఉంటే ఇక ఏంలాభం అనుకొని మానేస్తాననే అభిప్రాయాన్ని ఆ ప్రేమికుడి కోణంలో రచయిత గొప్పగా జోడించారు.

ప్రేమికుడు తన ప్రేయసికీ ఏదో కానుక ఇవ్వాలి అని,సంభ్రమాశ్చార్యాలకు గురి చెయ్యాలని తహతహలాడుతుంటాడు.నిజమైన ప్రేమికుడు ఈ పాటలో లాగా తన నవ్వును చూసో ,ముఖాన్ని చూసో  గొప్ప కానుకగా అనుభూతి చెందుతాడు.అందుకే ఇక్కడ నెలవంక కూడా తన నవ్వుకు సరిపోదంటాడు.
ఇక్కడ నవ్వుల్లో కూడా చాలా భిన్నమైన భావప్రకటనలను మనం చూడొచ్చు.ఇక్కడ నవ్వు తనని తనుగా ఇష్టపడే వారికోసం గుండెలోతుల్లో నుంచి వచ్చే నవ్వు.అది వెలకట్టలేనిది.దాని ముందు ఏ బహుమతి నిలువదు.

ఏ ప్రేమికుడైనా తన ప్రేయసిని చూసినప్పుడు ఏదో కోణాన్ని తనలోకి ఆహ్వానిస్తాడు.నడకను హంస నడక అనో,కళ్ళను తామరలనో ఇంకా ఏదో విధంగా ఊహించుకుంటూ ఆ ఊసులలో బ్రతుకుతుంటాడు. ఇక్కడ రచయిత ప్రయోగం వినూత్నమైనది.కొంత అతిశయం,కొంత ప్రతీపాన్ని జోడించి ఆమె నడిస్తే నేలకు తారలు మొలుస్తాయని,ఆమె శ్వాసను వదిలితే గాలులు బ్రతుకుతాయని రచయిత కొత్తదనాన్ని ఆపాదించే ప్రయత్నం చేశాడు.అందులో సఫలమయ్యాడు.

మొదటి చరణాన్ని ఇంద్రధనుస్సును,నల్లమబ్బులను తీసుకొని చిక్కగా అల్లాడు.ఇంకా వీటికి గిరాకి తగ్గట్లే. దాదాపుగా మనకు అక్కడక్కడ తగులుతూనే ఉంటాయి.అలాగని ఇబ్బంది ఏ మాత్రం పెట్టకుండా శ్రోతకు వదిలేసి రచయిత సులువుగా తప్పుకున్నాడు. ఇంద్రధనుస్సులో లేని రంగుగా ప్రేయసిని చెప్పుకొచ్చాడు.ప్రేమికుడికి ప్రేయసి ఎప్పుడు ప్రత్యేకమే. కాబట్టి అతను అలాగే అంటాడు,అనాలి.ఇంద్రధనుస్సును చూసి మనమంతా మురిసిపోతాం.అందులోలేని రంగును తన ప్రేయసికి రుద్ది ఇక్కడ ప్రేమికుడు సరికొత్తరంగుతో చీరను నేయటానికి సిద్ధమవుతాడు.సాధ్యపడుతుందా అనే ప్రశ్న వేసుకుంటే వారివురి మధ్యలో ఉండే పటిష్టతే సమాధానం చెబుతుంది.కళ్ళను నల్లమబ్బులతో పోల్చడం సహజమైన విషయమే కానీ కాటుక కూడా పెట్టనంత సహజమైన అందం నీది అని చెప్పడానికి రచయిత వాడిన పదాలు కొంత పదునుగా లోతుగా దిగుతాయి.అంతకు ముందు కాలంలో దిష్టితగలకుండా ఉండడం కోసం బుగ్గలకు చుక్క పెట్టేవారు.ఇప్పుడు కాళ్ళకు దారాలు కట్టుకుంటున్నారు.అంతమాత్రాన వారితో విభేదించేదేమి లేదు.”కాకి పిల్ల కాకికి ముద్దు” అనే సామెతను గుర్తుచేసుకొని నిశ్శబ్దంగా ఉంటే సరిపోతుంది.ఈ పాటలో ప్రియుడు పూర్తిగా తనలో లీనమయిపోయాడు.ఎంతలా అంటే తనకు దిష్టి తగలకుండా బుగ్గకే కాదు తనువంతా చుక్కను పెట్టాలనేంతలా.రచయిత ఈ పాదాలలో అభివ్యక్తిని తారాస్థాయికి తీసుకెళ్ళాడు.ఇదే చరణంలో ప్రేయసికి బహుమతి ఏదో ఒకటి ఇవ్వాలని ఆశపడి చివరకు తనను మించిన బహుమతిలేదని తెలుసుకొని తన ప్రాణాన్ని తాళిబొట్టుగా పేని కడతాను అని చెప్పటంలో గొప్ప సందేశాత్మకత దాగి ఉంది.ప్రేమ పేరుతో మోసంచేసేవాళ్ళకు ఈ పాదాలు చెంపపెట్టులాంటివి.ప్రేమంటేనే నిజం.నిజం లేని చోట, నిలకడ లేని చోట ప్రేమ ఆత్మహత్య చేసుకుంటుంది.

ఇప్పటిదాకా ప్రేమికుడికి ప్రేయసి పట్ల ఉండే భావనలను రచయిత చూపించారు.రెండవ చరణం ప్రేయసి ప్రేమికుడి నుండి ఏం ఆశిస్తుందో,తాను ఏం ఇవ్వాలనుకుంటుందో అనే అంశాల కలబోతగా ముందుకు సాగుతుంది.ప్రేయసి కూడా ఆకాశాన్నే ఇవ్వాలనుకుంటుంది.ఆమె కూడా “విశాలత” అనే అర్థంలోనే ఇద్దామనుకోవచ్చు కానీ అతని హృదయం ముందర చిన్నదని ఊరుకుంటున్నాను అంటుంది.రచయిత రెండు వేరు వేరు సందర్భాల్లో ఒకే అంశాన్ని తీసుకొని అక్కడ మబ్బులు కమ్మేస్తాయని,ఇక్కడ హృదయం ముందర చిన్నదవుతుందని ఎంతో సమర్థవంతంగా రాయటం గమనించవచ్చు.

ఏ స్త్రీ యైనా ఏమి కోరుకుంటారు పుట్టినింటినుంచి మెట్టినింటికి వెళ్ళినప్పుడు అమ్మలాంటి ప్రేమను,నాన్న లాంటి అనురాగాన్నే కోరుకుంటారు.ఇక్కడ రచయిత దృష్టికోణం మొదటి చరణంలోనుండి రెండోచరణంలోకి వచ్చే సరికి పూర్తి భిన్నంగా మారిపోయింది.అంతసేపు ప్రేమికుడికి,ప్రేయసి పట్ల ఉండే ప్రేమ భావనలను కుప్పపోశాడు.రెండవ చరణంలో మళ్ళీ  ప్రేయసి వైపుగానే నిలబడి ప్రేమికుడితో తన జీవితం ఎలా ఉంటే బాగుంటుందో అని చెప్పిస్తాడు.ఓ రోటీన్ లోకి తీసుకెళ్ళి నీ కోసం మళ్ళి మళ్ళి జన్మిస్తాను అని ప్రేయసితో పలికించి ముగిస్తాడు.వాస్తవానికి ఈ పాటను బ్రతికిస్తున్నదంత పల్లవి,మొదటి చరణమే.రెండవచరణం కూడా తన స్థాయిలో నిలబడింది.పాటలో పల్లవి కీలక భూమిక పోషిస్తుందన్న విషయం తెలియనిది కాదు.

ఓ సారి ఆ పాటను చూద్దాం..

పల్లవి :

నీలి నీలి ఆకాశం ఇద్దామనుకున్నా
మబ్బులు నిన్నే కమ్మేస్తాయని మానేస్తూ ఉన్నా

నెలవంకకు ఇద్దామనుకున్నా.. ఓహో ఓహో
నీ నవ్వుకు సరిపోదంటున్నా…

నువ్వే నడిచేటి తీరుకే
తారలు మొలిచాయి నేలకే
నువ్వే వదిలేటి శ్వాసకే
గాలులు బ్రతికాయి చూడవే
ఇంత గొప్ప అందగత్తెకేమి ఇవ్వనే

నీలి నీలి ఆకాశం ఇద్దామనుకున్నా
మబ్బులు నిన్నే కమ్మేస్తాయని మానేస్తూ ఉన్నా

చరణం – 1
ఓహో వానవిల్లులో ఉండని రంగు నువ్వులే
ఏ రంగుల చీరను నీకు నెయ్యాలే
నల్ల మబ్బులా మెరిసే కళ్లు నీవిలే
ఆ కళ్లకు కాటుక ఎందుకెట్టాలే
చెక్కిలిపై చుక్కగా దిష్టే పెడతారులే
నీకైతే తనువంతా చుక్కను పెట్టాలే

ఏదో ఇవ్వాలి కానుక ఎంతో వెతికాను ఆశగా
ఏది నీ సాటి రాదిక అంటు ఓడాను పూర్తిగా
కనుకే ప్రాణమంత తాళి చేసి నీకు కట్టనా

నీలి నీలి ఆశాశం ఇద్దామనుకున్నా
నీ హృదయం ముందర ఆకాశం చిన్నది అంటున్నా

చరణం – 2
ఓహో అమ్మ చూపులో వొలికే జాలి నువ్వులే
ఆ జాలికి మారుగా ఏమి ఇవ్వాలే
నాన్న వేలితో నడిపే ధైర్యమే నీదే
నీ పాపనై పసి పాపనై ఏమి ఇవ్వాలే
దయ కలిగిన దేవుడే మనలను కలిపాడులే
వరమొసగే దేవుడికే నేనేం తిరిగివ్వాలే

ఏదో ఇవ్వాలి కానుక ఎంతో వెతికాను ఆశగా
ఏది నీ సాటి రాదిక అంటూ అలిసాను పూర్తిగా
కనుకే మళ్లి మళ్లీ జన్మనెత్తి నిన్ను చేరనా
నీలి నీలి ఆకాశం ఇద్దామనుకున్నా
మబ్బులు నిన్నే కమ్మేస్తాయని మానేస్తూ ఉన్నా

చిత్రం :30 రోజుల్లో ప్రేమించటం ఎలా?
రచన:చంద్రబోస్
గానం:సిద్ శ్రీరామ్
సంగీతం:అనూప్ రూబెన్స్