అక్కడ పదచిత్రాలు మెరుస్తున్నాయ్!

నిజానికి నేను కల్పనని చూసి చాలా రోజులైందని వెళ్ళాను

అక్కడ దర్శకులు నర్శింగరావు గారు కనపడ్డారు. ఎదురుగా ఉన్న పెద్ద హాల్లో ఎవరికో సూచనలిచ్చి పని చేయిస్తున్నారు.

ఎందుకో అటువేపెళ్ళి చూస్తే.. ప్రతి చోటా అఫ్సర్ కవిత్వం గోడల నిండా అందంగా అమరి ఆ హాలంతా ప్రవహిస్తూ.. రంగు రంగులుగా

తెల్లని గోడల మీద క్రమ శిక్షణ తో ప్రతి ఫ్రేమూ…

పొద్దున్నే ఒక కల కోసం

ఆకు పచ్చని ఆకాశం

స్వాప్నికుడి నిఘంటువు

కన్నీటి లోపల..

నచ్చిన కవితలని పుస్తకం  ముందేసుకు చదవడం కాక, గోడ దగ్గర నిలబడి మంచి వర్ణ చిత్రాన్ని చూసినట్టు అపురూపంగా పైకి చదువుకోవడం (అవును పైకే)  గొప్ప గా అనిపించింది

కవి ప్రయాణాన్ని ఛాయా చిత్ర ప్రదర్శన గా ఏర్పాటు చేయడం ఇదే ప్రప్రథమం .

నాలుగు తెలిసున్న  మొహాలు కనపడతాయి పలకరిద్దాం అని వెళ్తే నలభై కనపడ్డాయి.

అసలు ఈ ప్రదర్శన కోసం నరసింగ రావు గారు పడిన శ్రమ అంతా ఇంతా కాదు. చింతకాని, ఖమ్మం, హైద్రాబాదు ఇలా అన్ని చోట్ల తిరిగి , అక్కడ ఉన్న ఫొటోలన్నీ సేకరించి, వాటిలో మంచివి, తగినవి ఎంపిక చేసి వాటికి అందంగా, కళాత్మకంగా ఫ్రేమింగ్ చేసి, మధ్యాహ్నం నుంచే సాలార్జంగ్ మ్యూజియం కి పోయి అక్కడుండి పనులన్నీ పర్యవేక్షించి, అడుగడుగునా ఆయన శ్రమ, ఆసక్తి, కవి మీద అభిమానం, కళ మీద అభిమానం ప్రస్ఫుటంగా కనపడేలా ఎంతగా  తీర్చి దిద్దారంటే సభ ప్రారంభమైనా చాలా మంది ఆ చిత్రాలు చూస్తూ తిరుగుతూనే ఉన్నారు

ఎంపిక చేసిన ఛాయా చిత్రాలన్నీ,ఖమ్మం, ఆస్టిన్,మాడిసన్, ఆస్టిన్, ఫిలడెల్ఫియా ఈ నగరాలూ, కవిత్వం, టీచింగ్, ఎడ్యుకేషన్, ఇంటర్నేషనల్ ప్రయాణాలూ, వివిధ ప్రాంతాల్లో ఉపన్యాసాలూ.. ఇలా వేటినీ  మిస్ కాకుండా ఏరి కూర్చి మాల కట్టారు

అవన్నీ చూస్తుండగా గొప్ప సందేహం! ఇవన్నీ ఏం చేస్తారు ప్రదర్శన తర్వాత? ఇంత చక్కగా ఏర్చి కూర్చి కట్టిన పటాలన్నిటినీ?

తీసుకు పోతున్నాం కొత్త ఇంటినిండా పెట్టుకుంటామని కల్పన చెప్పాక కుదుట పడింది బుర్ర . కొత్త ఇంటి గోడలకు సరి కొత్త అలంకారాలు !!

మున్ముందు ఇలా మరెంతమందో కవులకు ఇలా ఛాయా చిత్ర ప్రదర్శన ఏర్పాటు జరుగుతుందేమో కానీ తెలుగు కవుల్లో ఈ గౌరవం దక్కింది అఫ్సర్ కే! అందరి బంధువూ, అజాత శత్రువు ని ఆ  మాత్రం గౌరవించుకోక పోతే ఎట్లా?

*