నీకోసం రాసిన కవిత

నా చితి కాలిపోయాకా

చిత్తు కాగితాల్లో పాత పుస్తకాల్లో

నీ కోసం రాసిన కవితకై వెతకొద్దు

ఊపిరి పదాలతో అల్లిన జీవమాల అది

శ్వాసతో బాటే తెగిపోయుంటది

గాలిలో లీలలా కలిసిపోయుంటది

2.

నువ్వూ – నేనూ

ఎల్లల్లేని మైదానంలా నువ్వూ

అచ్ఛాదన లేని అరికాళ్లతో నేనూ

పుడమిని కమ్మిన వాయువరణంలా నువ్వూ

చేతులుచాచిన దాహపు కౌగిలై నేనూ

అకారణంగా అనంత ఏకాంతంలో

నీకు నువ్వుగా నువ్వూ

నిను తాకుతూ ముద్దాడుతూ

నీ తోడు కోరే తీరనిమోహం నేనూ

3.

మెలుకువకూ నిద్రకూ మధ్య

మెలుకువ

నిద్రలోకి జారే

పాకుడురాళ్ల సందుల్లో

మెలుకువ పసిగట్టలేని

నిద్ర స్వప్నించలేని

అరుదైన దివి పుష్పాలుంటాయి

తీరిగ్గా చూసే వీలుండదు గానీ

చూపుకు కాస్త తేనుంటే

ఒకటో రెండో అతుక్కొని

నిద్రలోయలోకి జారిపడతాయి

స్వప్న తరువులపై తళుకులీనుతాయి

మెలుకువ ధ్యానంలో

కవనవన కువకువలై వచ్చి వాలతాయి

*