ఇషాక్ హుసేన్ కవితలు మూడు

1

కిటికి ఆవల

ముసురు రాతిరిలా
నా గది నిండా
అలుముకున్న దిగులు చీకటి_

చమురింకినా…
విఫల ప్రయత్నంగా దిగుట్లో దీపం
ఆరిపోతూ రెప రేపల  మధ్య .

గోడలు
తరాల మౌన దీక్షలో నిశ్శబ్దాన్ని భరిస్తూన్నాయి.

కిటికి ఆవల
పలకలు కట్టిన కరిమబ్బుల ఆకాశం
ఎవరి వాటకో ఆతిధ్యం_

నేల ఆనిన
అడుగుకిందా దృశ్యం కట్టని
నీడ

రహస్యంగా
నా పాదముద్రలను మోస్తూనే ఉంది_

నేనింకా
ఎంత నడవాలి నా మీద నాకే అసహ్యంగా ఉంది…
దుఃఖానికి ఆశకి మధ్య వారధిగా_

దారి పొడువునా…
ఆసువులు బాసిన
అరణ్య స్వప్నాల కన్నీటి చుక్కలు…
మిణుగురులై మెరుస్తునే ఉన్నాయి_

వెన్ను విరిగిన  వెదురు బొంగు
వేరవడం లేదు శిధిల స్తూపాలపై

జెండాను
మోస్తూ..!మోస్తూ!!