మగోనికి మీసం మూతినుంటే, ఆడదానికి మునిచేతి నుంటుంది ! 

                    ఈ ఇసియం ఆ బటురాజుకు తెలుస్తుంది. ఆ బటురాజు చినరాజును అడగతాడు. నీ మెల్లో ఈ పూలమాల ఎవురేసినారు  అని. అబుడు ఆ చినరాజు చెప్తాడు.ఇట్లా నా బారియ పతివర్తతనానికి గురుతుగా ఏసింది.ఈ పూలమాల ఎబుడు వాడితే అబుడు నా బారియ చెడిపోయినట్లు లెక్క, అని చెప్తాడు. అది మనసులో పెట్టుకున్న ఈ బటురాజు పన్నెండు మంది దొంగల్ని పంపిస్తాడు ఆయమ్మను చెడిచేసి రమ్మని. ఈ పన్నెండు మంది దొంగలు ఆమె దగ్గరికి పోతారు. అప్పుడు ఆయమ్మ చెప్తుంది మీరు నన్ను అంటుకోవాలంటే నేను చెప్పిన రెండు పనులు చేయల్ల, లేదు అట్లకాదని నా మీద బలాత్కారం చేస్తే మీ అందరూ తలలు పగిలి సస్తారు అని శాపిని పెడుతుంది. అబుడు ఏం చెబుతుందంటే “ఈ తాటాకుల గుడిసి తీసేసి ఒంటిస్తంబం మేడగట్టల్ల,  ఈ మేడ ముందర ఒక కొలను తొగి దానికి ఎండి మెటికి, బంగారు మెటికి పెట్టి, పూలవనాలు కాయించల్ల, అబుడే నన్ను మీరు అంటుకోగలరు” అని.  అదే పకారం ఆ దొంగలొచ్చి ఆ రాజుకు చెప్తారు.ఇట్లా అని చెప్పిందని.  సరేలే అని ఆ రాజు కావలసిన రొక్కమిచ్చి ఆయమ్మ చెప్పినట్లు చేయమంటాడు. ఈ దొంగలొచ్చి  ఆయమ్మకు ఇల్లు కట్టే పనిలో ఉంటారు.

                     ఈ బటు రాజుకు ఒగ కూతురు ఉంది. ఆ కూతురికి రాసపుండు పుట్టింది. ఆయమ్మ దాని నొప్పికి  కోడై, ఆవై  రేయి పొగులు అనే తేడా లేకుండా అరస్తా ఉంటుంది. రేయి పొగులు ఆఊర్లో ఉండే జనాలంతా ఆయమ్మ అరుపులకు బయపడుతున్నారు. ఆ రాజు ఎక్కడెక్కడినుంచో వైదుగుల్ని పిలిపించి  చూపిస్తా ఉంటాడు. కానీ పలితం లేదు. ఎవురు గాని ఆ పుండు మానిపేవాల్లే  దొరకలా. ఈలోగా ఈ చినరాజు బారియ ఒగ కోమటిశెట్టి  ఏసికమేసుకొని కావలసిన వంటలన్నీ చేసి,ఎద్దుల బండి కట్టుకొని, వంటలన్నీ ఆ బండ్లో పెట్టుకొని బండి తోలుకొని పోతా ఉంటుంది.అంతలో పొద్దు పోతుంది. ఆ   అడవిలో ఒక తావన గుడుంటే  బండి ఆడ నిలిపి ఈయమ్మ ఆ గుళ్లో ఆ రేయి రేతిరి పొనుకొంటుంది. ఆడికి రెండు చిలకలు వస్తాయి. ఆ చిలకలు రెండు అక్క చెల్లెల్లు . “పద్మావతీ పద్మావతీ  పొద్దన్నా పోనీ, ఒగ కతన్న చెప్పు” అని అక్క చెల్లిని అడుగుతుంది. “ఏం కత చెబుదులే మన బతుకే ఒక కత ” అని తుర్రని ఎగిరిపోయి మల్లొచ్చి కొమ్మమీద కూసుంటుంది . అట్ల కాదు ఏదో కత చెప్పు పద్మావతీ , పొద్దుపాలా నిద్రరాలా  అని మల్లా అడుగుతుంది అక్క చెల్లిని. అబుడు మొదట నుంచి ఈల్ల కతే తిరగ చెప్తుంది. ఆరాజు అదేగుళ్లో వరపడింది, ఆ చినరాజుని కనిండే కాట్నుండి చెప్పక వస్తుంది.  “ఇట్లా ఆ బటురాజుకు ఒకూతురుంది. ఆ కూతురుకు ఒగ రాసపుండు పుట్టింది  దాన్ని మానపల్లంటే  ఇబుడు మనం కుసోనుండే కొమ్మమీద ఆకులు, మనమేసిన లద్ది  నున్నగా నూరి మూడు కట్లు కడితే ఆ యమ్మకు  ఆ రాసపుండు నయమైతుంది”  అని ఇదంతా  ఈ యమ్మ ఇనే. ఆ రేరేతిరి ఆ గుల్లో  ఉండి పొద్దున్నే లేచి ఆ చిలకలు చెప్పినట్లే ఆ కొమ్మ ఆకులు, ఆ చిలకలేసిన లద్ది మూట కట్టుకొని,అన్నీ బండికి పెట్టుకొని చిన్న రాజుండే ఊరుకొస్తుంది.  ఆ ఊరిలో జోగి రానీ ,జంగం రానీ,  ఎవురన్నా రానీ  ఆ ఊరు రాజే వాళ్లకు ఉండడానికి చోటు చూపించి, తిండి తీర్తము చూసుకోవాలంట. ఈ కోమిటిశెట్టి  రాజంచుకు పోయి రాజా ఇట్లా నేను యాపారం చేసుకోను ఈ ఊరొచ్చిన, నాకు ఉండే దానికి సోటు చూపించు అని అడుగుతుంది. ఆ బటురాజు చినరాజును పిలిసి ఆ కడిల్లు సూపించి  ఆడుండమను ఆ కోమిటిశెట్ని అని చెప్తాడు. ఈ కోమటిశెట్టి రోజూ వంట్లు  చేసి చినరాజుకు  పెడతా ఉంటాడు. అట్లా ఈల్లిద్దరూ బాగా మచ్చికైతారు.

                      ఈ బటురాజు,  కూతురి  రాసపుండు ఎవరైనా మానిపితే  రాజ్యంలో అర్ద రాజ్యం రాసిచ్చి,  కూతుర్నిచి పెండ్లి చేస్తాను అని పకటించినాడు అని ఈ కోమటిశెట్టికి  చెప్తాడు చిన రాజు.ఆ మాటకు ఈ కోమటి శెట్టి,నేను మానుపుతాను కానీ ఇబుడు కాదు, నేను మా ఊరికి బోయి కొన్ని దినాలకు వస్తాను. మల్ల ఆమెకి వైదిగం చేస్తానని చెప్పి ఆట్నుండి వచ్చేస్తాడు. మల్ల ఈమె కోమిటిశెట్టి అవతారం తీసేసి మామూలు ఆడది మాదిరి అలంకరించుకొని మల్ల చినరాజు కాడికి వచ్చి నేను కోమటిశెట్టి భార్యని నా బర్త వచ్చేవరకు నేను యాపారం చేసుకుంటా అని చెప్తుంది. సరే అని చిన్నరాజు వాల్లింటి బీగాలిస్తాడు. ఆయమ్మ ఇంట్లో  బాగా వంటవార్పు చేసి చినరాజుకి పెట్టేది. అట్లా వాళ్ళిద్దరూ బాగా మచ్చికై ఇద్దరూ కలుస్తారు. ఆచినరాజుతోనే మూడు నెలల గర్బవతయి “చినరాజా ఇంగ నేను పొయెస్తాను, నీ గుర్తుగా నాకు  ఏమన్నా ఇయ్యి ” అని అడిగి చిన్నరాజుది రాజముద్రిక, కిరీటము, పట్టపుకత్తి ఈ మూడు తీసుకొని ఎలిపొయి వాటిని అక్కడ ఒంటి స్తంబం మేడలో పెట్టేసి మల్ల కోమిటిశెట్టి ఏసికం ఏసుకొని తిరిగి వచ్చేస్తుంది.

                     ఈ చినరాజు ఆ కోమిటిసెట్టిని చూస్తానే ఏమిసెట్టి ఇన్నాళ్లు రాలేదు. మీ వాళ్ళందరూ బాగుండారా అని అడుగుతాడు. అందరూ బాగున్నారు చినరాజా, ఇబుడు మనము బటురాజు కూతురుకు రాసపుండు మానిపేదానికి పదాము, నేను మందాకు తెచ్చిన అని ఆపొద్దు రెండు చిలకలు చెప్పిన మందాకు నూరి ఆ రాసపుండుకు పూసి మూడు కట్లు  కడతాడు. పుండు మానిపోతుంది. ఎవరైతే ఆ పుండు మానపతారో వాళ్లకు అర్ద రాజ్యాన్నిచ్చి ,కూతుర్నిచ్చి పెళ్లి చేయల్లన్న మాట పకారం  ఈ కోమిటిశెట్టికి  రాజుకూతురినిచ్చి పెళ్లి చెయల్లని  అన్నీ  సిద్దం చేస్తుంటారు .