వేరు చేసే చూపు

నా పైదాయీష్
అందరిలాంటి ఆమ్ ఖాస్ దే
పెరుగుతున్నా కొద్దీ వేరు చేసే చూపు
సంధిస్తుంది సమాజం
ఎక్కడికెళ్లినా, ఏం చేస్తున్నా
వెంటాడే చూపు అది
వేటాడే చూపు అది
ప్రేమ చూపో,
కైపు చూపో కానే కాదు
ఆపాదమస్తకం గుచ్చే చూపు
అణువణువును గాలించే ఎక్స్ రే చూపు

*

గడప లోపల ఉన్నా
బయటకు వచ్చినా
నా పరిభ్రమణలపై డేగలా
పహారా కాసే కెమెరా కన్ను
పై చదువుల కోసం
ఆశ కొద్దీ బయటకు అడుగిడిన దాన్నీ
బుర్ఖా విప్పించి
పరీక్షా కేంద్రాల్లో జరిపే దేహపు స్కానింగులు
మా నసీబుల్లో అదే రాతను తిరగరాస్తున్నాయి

*

సాంకేతికతతో నవీనంగా కనబడే
ఏర్పోర్టులను
నేను కప్పుకునే హిజాబ్ భయపెడుతోంది తెలుసా
రహస్య అవయవాల్లో దాచిన బంగారాన్నో, మాదక ద్రవ్యాలనో
గాలించి తీసే ఆ టెక్నాలజీకి అందదట నా బుర్ఖా
అందుకే,
హిజాబ్, నఖాబ్ లను దాటుకుని
లోపల ఉన్న లిబాజ్ ను
తడిమి తడిమి చూస్తే తప్ప
తసల్లీ లేదు వారికి

*

నిఘా నీడల్లోనే జిందగీ గుజారా  చేసేవాళ్ళం
ఏ సారూప్యతలు లేకున్నా
అవమానం కానుకగా పొందేవాళ్ళం
చూపుల శరాల్లో బందీ అయిన వాళ్ళం
అవును
అడుగడుగునా అనుమానపు చూపులను
అవిభక్తంగా ధరించిన వాళ్ళం
మానకుండా సలపరిస్తోంది
పుట్టుక నుంచీ లేని విషపు చూపు గాయం
ఉంటుందో లేదో వచ్చే తరానికైనా
కరకు చూపుల నుంచి ముక్తి, విముక్తి

*