విన్నపాలు వినవలె!

పయనం ముఖ్యమా? గమ్యం ముఖ్యమా?? అంటే రెండూ ముఖ్యమే.

నలుగురం కలిసి ప్రయాణం చేయాలనుకున్నప్పుడు ఏదో ఒక గమ్యం ఉండాలి. ప్రయాణం చేయడం వెనక కారణాలు ఏవైనా కావచ్చు. ప్రయాణించడం, స్నేహితులతో కలిసి ప్రయాణించడం, హిమాలయాలంటే ఓ ఆకర్షణ, దైవ దర్శనం ,ఇంటి బాధ్యతల నుండి కాస్త వెసులుబాటు దొరికాక మనకంటూ సమయాన్ని కేటాయించుకోవడం… ఇలా ఏవైనా కావచ్చు. ఆ విధంగానే ఆరుగురం స్నేహితురాళ్ళం కలిసి మా యాత్ర ప్రారంభించాం. అందరికీ ఎంతో ఇష్టమైనది హిమాలయాల సందర్శనం. అందుకని అటువైపుగా మా యాత్ర మొదలైంది. ఆదికైలాశ్, ఓం పర్వత్ సందర్శన చేసుకురావాలని నిశ్చయించుకున్నాం. ఈ యాత్రను నిర్వహించే ఒక ట్రావెల్స్ వారిని సంప్రదించి వారి ద్వారా ఈ యాత్ర మొదలుపెట్టాం. అయితే ఆ రెండింటిని దర్శనం చేసుకునేందుకు వెళ్లి వచ్చే దారులలో మరికొన్ని ఆకట్టుకునే స్థలాలను, క్షేత్రాలను దర్శించుకున్నాం. అదే ఇప్పుడు మీతో పంచుకోవాలనుకుంటున్నవి.

ఈ మందిరంలో  గోలు గుర్రాన్ని అధిరోహించి ఉన్న విగ్రహం ఉంటుంది.శివుడి అవతారంగా భావించే Gollu / Goljya దేవతను స్థానిక ప్రజలు పూజిస్తారు.  కోరుకున్న కోర్కెలను తీరుస్తాడని, నిష్పాక్షికంగా న్యాయం అందజేస్తాడని ఇక్కడే ప్రజల నమ్మకం. ఇప్పటికీ గుర్రంపై ఆ ప్రాంతాలలో సంచరిస్తూ ఉంటాడని అనుకుంటారు.

కుటుంబ కలహాలు తీర్చమని ఓ కుటుంబ పెద్ద, ప్రేమను ఫలింప చేయమని ఒక ప్రేమికుడు, ఉద్యోగం రావాలని కోరుకుంటూ ఒక నిరుద్యోగి, పరీక్షలు పాస్ అవ్వాలని ఓ అమాయక విద్యార్థి, ఏ విఘ్నాలు లేకుండా వివాహం జరిగిపోవాలని ఒక తండ్రి ఇలా అనేకం. ఆస్తి తగాదాలను తీర్చమని కోరుకునే అన్నదమ్ముల నుండి కోరుకున్న అమ్మాయి దక్కాలని ప్రేమికుడి  వరకు అందరూ ఎంతో నమ్మకంతో సందర్శించే మందిరం ఇది.