రెహానా కవితలు రెండు

పుస్తకం

దాహం వేసినప్పుడు
కుండలో నుంచి కాసిన్ని
నీళ్లు ఒంపుకున్నట్లు

వీధిలో చే పంపు దగ్గర
దోసిలి నిండా నీళ్లు పట్టుకుని
గొంతుకలోకి నింపుకున్నట్లు

ఊరి చివరి గిలకల బావిలో
బిందె వేసి అన్ని
నీళ్ళు తోడుకున్నట్లు

అక్షరాల ఆకలేసినప్పుడు,
వాక్యం పై బెంగేసినప్పుడు
పుస్తకాన్ని అందుకోండి

గతం నుంచి భవిష్యత్తుకు రహదారి! రాచరికం నుంచి విప్లవం వరకు బాటసారి!
వేల, లక్షల, కోట్ల మస్తిష్కాల
ఆలోచనల ప్రవాహం!
రేఖాగణితానికి అందని
మనుషుల లోతులను
ప్రతిఫలించే నిలువుటద్దం!!
సాగర మధనం నుంచి
అమృతం పుట్టినట్లు
ఎన్ని కోటానుకోట్ల విస్ఫోటనాలు
జరిగాయో!!

ఆకలేసినప్పుడల్లా
గుప్పెడు అక్షరాలను గుండెల్లో పోసుకోండి

కొత్త జీవం చిగురేస్తుంది.

*

 మిట్ట మధ్యాహ్నం