రెండు కిటికీలు

గుండెల్లో జల్లు కురిపించే మెరుపుకి

ఆ కొసన నీ కళ్లు

ఈ కొసన నా కళ్లు

ఈ సందర్భం ఇంక రాకపోవచ్చు!

అయినా నేనొస్తాను

కిటికీలోంచి

నిన్ను పలకరించే వానలో

చిన్ని తుంపరనై

లేదా

నిన్నో కన్నీటిబొట్టుగా

మార్చివేసి

అందులో కొలువుండే

అక్షరాన్నై..

తెరిచే ఉంచు..

రెండు కిటికీలూ

2. అద్వైతం

నాలో పొంగుతున్న

నదీ తీరాన

నువ్వు నడిచొస్తుంటే

ఆ అలలు

నీ పాదాల్ని

స్పృశిస్తుంటే

బయటెక్కడో నిన్ను వెతికిన

ఇన్నేళ్ళ నా అమాయకత్వానికి

మౌనంగా నవ్వుకుంటాను!

3. నది – నావ

రెండుగా చీల్చాలనుకునే

నావ ప్రయత్నానికి

ముసిముసిగా నవ్వుకుంటూ

నావ వెనకే ఏకమౌతూ

నది!

4. వాడని పువ్వు

ఆకాశంలో తారల్లా

ఆమెజడలో మెరిసి

పొద్దుటికి వాడిపోయే

పూలని చూస్తే

చెప్పలేనంత దిగులు

రాత్రిని వెలిగించిన

పూల పరిమళం మాత్రం

ఎన్నటికీ వాడని జ్ఞాపకం!

5. గుండెలో నక్షత్రాలు

ఆమెని నేను

ఆరాధించాను

నా క్షణాలన్నిటినీ

పువ్వులుగా మార్చి

ఆ పాదాల చెంత

అర్పించాను

ఒక్కొక్క నక్శత్రాన్నే వెలిగించి

మనసులోని

ఒక్కో అగాధపు రహస్యాన్నీ చెప్పింది

తెల్లవారు ఝామున అడవిలో

ఆకుల మీంచి జారే మంచు బొట్టుని

నాగుండెలో నింపింది

విశ్వమంతా ఒద్దికగా

అందులో ఒదిగిపోయింది

కాసేపటికి ఆమె కూడా

ఆ మంచు బొట్టులోకి

వెళ్ళిపోయింది

ఇప్పుడు నక్షత్రాలన్నీ

నా గుండెల్లోనే!

*