కొత్త మాటల్ని వెతుక్కోవాలి!

ప్రపంచం
ఇంత సంక్లిష్టమని
ఇప్పుడే తెలిసింది.
వైరస్ పేదలకే ఎక్కువ వైరి.
ఉద్యోగాలు పోతున్నాయి
బతికుంటే
బలుసాకు కూడా మిగిలేటట్టులేదు.
క్రిమి వర్సెస్ ఎకానమీ.

ఊపిరితిత్తులు
అందరికీ వుంటాయి
కాని కూలీలకు
బయట వేలాడుతుంటాయి.
చేతులు అందరికీ వుంటాయి
కాని కూలీలకు
చాకిరే శానిటైజరు.
సొంతూళ్లకెళ్ళి
ఏం చేస్తారు తండ్రీ!
అక్కడా ఇదే ఎండ!

ఏ దేశంలోనైనా
శ్రీమంతులు బాగానే వుంటారు
ఎల్లనివారిదే లొల్లి.
మెలో డ్రామాలు చూసి
కన్నీళ్లు పెడితే చాలదు.

మనిషి, మానవత
సహనం,సంకల్పం
ఈ పదాలన్నీ
నిరర్థకంగా రాలిపోతున్నాయి.
ఇప్పుడు కవిత్వం రాయడానికి
కొత్త మాటల్ని వెతుక్కోవాలి.