ఒక కదలిక కదిలి చూడు

నీలో మూగరోదనలన్నీ కరిగిపారిపోయేటట్టు
ఒక్కటంటే ఒక్క దెబ్బ తుడుంమ్మీద
మేఘఘర్జన నీ ముందు సెల్యూట్ చేసేట్టు

మౌనంగా ఉండడమంటే
మరణించినట్టుకాదు
అసలు పుట్టుకే లేనట్టు
పుడమికి నీవు తెలియనట్టు
నీ తల్లిగర్భం నిను ప్రాణిగా
స్వీకరించనట్టు

పుట్టిన పసిగుడ్డు
మొదటి ఆక్రందనలాంటి
ఒక్క శబ్దం ఎక్కడో నీలోనే..వెదుకు..

నిండు చూలాలి ప్రసవవేదనలాంటిది తప్పదునీకు
శబ్దజననం నిన్ను నీవు చీల్చుకోకపోతే పుట్టదు

నీరు నీలో
నిప్పునీలో
మంచునీలో
జలచక్రం నీలో
నీకు నీవే ఓ స్వజగత్తువి
జగతి నీ జవసత్వాల్లోంచి పొంగి పొర్లేటట్టు
ఒక కదలిక కదిలి చూడు

మనిషిగా నీవు స్థిరపడిపోయేటట్టు..