ఇనాక్ గారూ, వింటున్నారా?

ముస్లింలకు ప్రాతినిధ్యం కల్పించాలి

– షేక్ హుసేన్ సత్యాగ్ని . తొలి తెలుగు ముస్లిం కథారచయిత. కడపజిల్లా .

మొన్న ఫిబ్రవరి 12వ తారీకున తెలుగు సాహిత్య అకాడమీ పునర్ నిర్మించడం జరిగింది. దీనికి అధ్యక్షులుగా కొలకలూరి ఇనాక్ ను ఎంపిక చేయగా, మిగిలిన ఉపాధ్యక్షుడు, సభ్యులను ప్రభుత్వం ఎంపిక చేసి ప్రకటించడం జరిగింది. ఇందులో ప్రభుత్వ ఎంపిక చేసిన 11 మంది సభ్యులలో ఒక్కరుకూడా ముస్లిం సాహితీవేత్త లేకపోవడం మరీ అన్యాయం. తొలి ముస్లిం కథకుడు కడప జిల్లాకు చెందిన షేక్ మహబూబ్ మియా సాహెబ్ గారు 1927 లోనే కథలు రాశారు. ప్రాచీన సాహిత్యంలోనూ, ఆధునిక సాహిత్యంలోని అన్ని ప్రక్రియల్లోనూ విశేషమైన కృషి చేసినట్టు వంటి ముస్లిం సాహితీవేత్తలను ప్రభుత్వ విస్మరించడం నన్ను బాధించింది. అలాగే రాయలసీమ నాలుగు జిల్లాల నుండి ఒకేఒకరికి అవకాశం ఇవ్వడం కూడా దారుణం. ఆంధ్ర రాష్ట్ర ఏర్పాటు మొదలు ఇప్పటివరకు రాయలసీమను అన్ని విషయాలలో విస్మరించినటువంటి ప్రభుత్వ పెద్దలు సాహిత్యంలో కూడా విస్మరించారనే వాస్తవాన్ని రాయలసీమ ప్రజలు గ్రహించారు. కాబట్టి ఇప్పటికైనా ప్రభుత్వ పెద్దలు దీన్ని మరోసారి ఆలోచించి ముస్లింలకు ప్రాతినిధ్యం కల్పించాలి. అలాగే రాయలసీమ సాహితీవేత్తల కృషిని మరింతగా గుర్తించాల్సి ఉంది.

*

తెలుగు హిందువుల భాష?

-ఉషా ఎస్. డానీ

తెలుగు ప్రాంతీయ భాషా? మత భాషా? తెలుగును ప్రభుత్వం ఒక ప్రాంతపు భాషగా కాకుండా ఒక మత భాషగా భావిస్తోంది. తెలుగు భాషను సమర్ధంగా రాసే కవులు, రచయితలు హిందూయేతరుల్లోనూ చాలా మంది వున్నారు. తెలుగు వచనాన్ని, కవిత్వాన్ని గొప్పగా రాసే పది మంది సాహిత్యకారుల జాబితాను తయారు చేస్తే అందులో కనీసం నలుగురు ముస్లింలు వుంటారు. ఒకవైపు తెలుగు ప్రాచీన భాషయనీ, దేశంలో హిందీ, తమిళంతో సమానంగానో వాటిని మించో మాట్లాడేవాళ్ళు తెలుగువాళ్ళేనని మనం జాతీయ వేదికల మీద వాదిస్తూ వుంటాం. రాష్ట్రంలో భాషా అకాడమీ లను ఏర్పాటు చేసే సమయంలో మాత్రం హిందూయేతర మతస్తులను దూరంగా పెడుతుంటాం. మరింత స్పష్టంగా చెప్పాలంటే ఆంధ్రప్రదేశ్ ప్రభుత్వం తెలుగును హిందువుల భాషగా గుర్తిస్తోంది. ఇది తెలుగు భాషకు తీరని అపచారం. ప్రభుత్వం తెలుగును మత భాష అని బలంగా భావిస్తూవుంటే ఆ మేరకు ఒక ఉత్తర్వును జారీ చేసినా అది ఒక పధ్ధతిగా వుంటుంది. ఆంధ్రప్రదేశ్ తెలుగు అకాడమీలో సభ్యులుగా మాత్రమేగాక అధ్యక్షులుగా వుండదగిన అర్హతలున్న వాళ్ళు చాలామంది వున్నారు. కవుల్లో దేవిప్రియ, ఖాదర్ మొహియుద్దీన్, ముహమ్మద్ అఫ్సర్, కథకుల్లో ముహమ్మద్ ఖదీర్ బాబు, వేంపల్లె షరీఫ్ వున్నారు. తెలంగాణను కూడా పరిగణన లోనికి తీసుకుంటే ఖాజా, స్కైబాబ, అన్వర్ కూడా వున్నారు.

*

ఇనాక్ గారూ, ఏమంటారు?

• లక్ష్మీనరసయ్య

ఇది ముస్లిమేతర సమాజం.ఇక్కడ ముస్లింలు అదృశ్య మానవులు.ఇతరులు. నిత్య పీడితులు.పీడితుల చేత పీడితులు. వివిధ కోణాలనుంచి వివిధంగా బాధితులైన వాళ్ళు కూడా ముస్లింలను వ్యక్త మానవులుగా చూడలేని స్థితి. ముస్లింల పట్ల ప్రభుత్వ , సామాజిక ,సాంస్కృతిక సంస్థల దృక్కోణం  కూడా దీన్నే రిఫ్లెక్ట్ చేస్తుంది. కేంద్ర సాహిత్య అకాడమీ అవార్డుల విషయంలో ఇదే రుజువయ్యింది. ప్రస్తుతం ఆంధ్రప్రదేశ్ సాహిత్య అకాడమీ సభ్యుల విషయంలోనూ ఈ వివక్ష కనపడుతుంది. ఖాదర్ మోహియుద్దీన్, ఉషాయస్ డానీ,ఖదీర్ బాబు, వేంపల్లి షరీఫ్, ఖరీముల్లా, హనీఫ్ – ఇలా కనీసం పాతికమంది ప్రసిద్ద కవులూ రచయితలూ వున్నారు. ఆంధ్రప్రదేశ్ సాహిత్య సాంస్కృతిక చరిత్రలో ముస్లిం సాహితీవేత్తల, కళాకారుల పాత్ర  మరువలేనిది. సాహిత్యం ద్వారా ప్రజల్ని చైతన్యం చేస్తూ , ఈ ప్రాంత మానవ వికాసంలో తమ పాత్రను గొప్పగా నిర్వర్తిస్తున్న ఇంతమంది ముస్లిం రచయితల అస్తిత్వాన్ని గుర్తింప నిరాకరించి వారికి సాహిత్య అకాడెమీలో ప్రాతినిధ్యం లేకుండా చేయటం అప్రజాస్వామికం. బహుజన కధా పితామహుడు , అణగారిన కులాల సాహితీ రారాజు పద్మశ్రీ కొలకలూరి ఇనాక్ గారి అధ్యక్షతన ఉన్న ఆంధ్రప్రదేశ్ సాహిత్య అకాడెమీలో ఈ అన్యాయం జరగటం ఇంకా బాధాకరం. అలా అని ఆయన్ను వ్యక్తిగతంగా నిందించలేను. ఇది కేవలం ప్రభుత్వ చర్యో , అధ్యక్షుల పాత్ర కూడా ఇందులో ఉందో. ఏది ఏమైనా ఈ వివక్షను ఖండిస్తున్నా. ప్రజాస్వామిక వాదులంతా దీన్ని ఖండించాలని కోరుతున్నా.

*

నిరసన ప్రకటించాల్సిందే

• బండ్ల మాధవ రావు

ఎట్టకేలకు ఏర్పాటైన ఆంధ్రప్రదేశ్ సాహిత్య అకాడమీలో ముస్లింలకు రాయలసీమ వాసులకు తగిన ప్రాధాన్యం లేకపోవడాన్ని నిరసిస్తున్నాను. తెలుగు సాహిత్యంలో లెజండ్స్ అనదగిన ఎందరో కవులు రచయితలు ముస్లింలలో ఉన్నారు. అలాగే రాయలసీమ నాలుగు జిల్లాలకు గాను కేవలం చిత్తూరు జిల్లాకు మాత్రమే ప్రాతినిధ్యం కల్పించారు. దేవిప్రియ, ఖాదర్ లాంటివారు అధ్యక్ష పదవికి అర్హులు. వేంపల్లి షరీఫ్ లాంటి వారిని సభ్యులు గా నియమించి ఉంటే కడపకు, ముస్లిం వర్గానికి ప్రాతినిధ్యం ఇచ్చినట్లయ్యేది. కొంతమంది సభ్యుల కమిటీ ఇచ్చిన నివేదిక ఆధారంగా ఈ నియామకాలు జరిగినట్లు తెలిసింది. వారికి ముస్లిం కవులు కనబడకపోవడం నిరసించాల్సిన విషయం. ఈ వివక్షను అందరూ ఖండిచాల్సిన అవసరం ఉంది.

*

వివక్షపై పోరాడతాం

-వేంపల్లె షరీఫ్, కేంద్ర సాహిత్య అకాడెమి యువ పురస్కార గ్రహీత