ఒకే ఒక్క కవిత్వం మాత్రం….

రహస్యం

చిన్నపిల్లలు చాక్లెట్ కొనుక్కోను
మూల మీది కిరాణం షాప్ కు పోతూపోతూ
రూపాయి  పోగొట్టుకొని వెతుకుతూ
బిక్క మొఖం  వేసుకున్నట్టు
ఆనుపానులు తెలుసుకునేసరికి
బతుకు చేతులారా బేజారుతుంది

మందు గోళీలు ఎన్ని వేసినా
నడక ఎంత నడిచినా
మళ్లీమళ్లీ పుట్టుకొచ్చి
కర్రను కొంచెం కొంచెం  కొరుక్కుతినట్టు
చెదలులా చక్కెర బీమారి

శ్రుతి మించిన గుండె లయకు
అణచివేసే బ్లడ్ ప్రెషర్ టాబ్లెట్లు

బిగించిన పిడికిలి సడలుతుంది
నడక తప్పటడుగులు వేస్తుంది
ఇకనైనా నిలదుక్కుకుందాం అనుకునేసరికి
నిలువునా నీరుకారి మూతి విరుపు
బంగారు లేడి అయిపోతాం
అవయవాలు ఒక్కటొక్కటిగా
సహాయ నిరాకరణోద్యమం చేపడుతాయి
యవ్వనెవ్వనం ఎండమావిలా
ఒక విభ్రమ  నిస్సత్తువ  కలిగిస్తుంది
అసలుకే మోసం వచ్చి
స్టంట్లు హీరోలవుతాయి

జీరో విలువ  కనుక్కునే సరికి
పక్కఅంకెలు అంతర్దానమవుతాయి
జీవిత రహస్యం తెలిసేసరికి
సమస్తం బహిరంగమైపోతుంది

ఒకే ఒక్క కవిత్వం మాత్రం
అక్షరాల నిన్ను నన్నూ బతికిస్తుంది

*