స్వేచ్ఛ కవితలు మూడు

సాయంత్రాన్ని మూసివేయాల్సొచ్చింది

అంతే..

దడదడా రంగుల యుద్ధం..

విరహం

మట్టి వాసనయింది

రాలిపడినా ప్రవహించడం

ఇప్పుడు ఉనికి..

నీకోసం

నా ఎదురుచూపుల్లో పుట్టినవే

వానలంటే..

రాయిని తొలుస్తున్నా

నీకో సముద్రాన్నివ్వటానికి..

అంతరాళంలో సుడులు

పొమ్మని విసిరి కొడుతున్నాయి..

అప్పుడో అలసిన క్షణంలో

అలనై ఎగిరిపడుతున్నా..

కెరటాన్ని చీల్చుకొనొచ్చి

ఒడ్డున గాయపరచబడుతూ..

రాయిని తొలుస్తున్నా

నీకో సముద్రాన్నివ్వటానికి..

_______________________________________________________

పిల్ల

సముద్రం నుంచి నీళ్ళు,ఇసుక తోడుకొస్తుంది

పాదముద్రలతో

 సముద్రానికి దారి చూపిస్తుంది..

అలల నేత

 ఒడ్డు వరకు మాత్రమే ఓ విఫలయత్నం

రాలేని సముద్రం…పోలేని తీరం..

ఎంతటి హోరైనా చీకట్లో కేవలం వినిపించగలదు

ఈ పిల్ల మళ్ళీ సముద్రంలోకెళ్ళింది

ఒడ్డుకిప్పుడు దారి తెలిసి నిశ్శబ్దంగా ఏడ్చింది

సముద్రపు పిట్ట రాతిరి వేటాడుతుంటే

నా నీడ మీద మట్టి పోసుకుంటున్నా..

*