ఒకసారి వస్తావా?!

తీరిక లేదని
సాకులను సాగదీయకు సుమా

ఒకసారి నీ పాదాలను
అలలకు అప్పగించి చూడు
తెలతెల్లని నురుగుల చక్కిలిగిలి
నీ పెదవులపై చిరునవ్వులు
సాగు చెయ్యకపోతే అడుగు

వేడివేడి మొక్కజొన్నల ఘుమఘుమలు
వేగుతున్న వేరుసెనగ వాసనలు
నీ నాలుకపై
నదులను పోటెత్తిస్తాయి చూడు

గట్టు మీద కూర్చున్నప్పుడల్లా
తుపానులను దాచుకున్న
మనసులు సైతం
నవ్వులనావలెక్కి
ఆనందస్వర్గాలను తాకడం గమనించాను
నిరుపేదపూలు సైతం
గాలిని పూసుకుని
పరిమళభరితమై వీయడం చూసాను

మిత్రమా
నాకెందుకో సముద్రాన్ని
లోతుగా చూసిన ప్రతిసారి
ముందుకూ వెనుకకూ
పరుగులు తీస్తూ
రకరకాల విన్యాసాలు చేస్తూ
గాంభీర్యాన్ని తొడుక్కున్న జీవితంలా
అనిపిస్తుంది తెలుసా

ఎన్నిసార్లు నేను చూసినా
మిత్రమా ఒకసారి నువ్వొస్తే
నాలుగుకళ్ళనూ ఒకటిచేసి
కొన్ని అందమైన క్షణాలను
తీరికగా ఒలుచుకు తిందాం
గుప్పెడు అనుభూతిని
అమృతంలా తలాకాస్తా పంచుకుందాం