అద్దరికి

తడు – నువ్వు – నేను

ఒకటి – రెండు – మూడు

ఒకరి తర్వాత ఒకరు

ఒకరి మీద ఒకరు

పరుగో పరుగు

డెడ్-ఎండ్ చీకటి గుయ్యారానికి

ఎంతెంత దూరం

కూటికి కాటికి ఇంకెంత దూరం

 

ఇక్కడేమీ లేదు

ఏ రక్షకుడూ కనపడుట లేదు

ఏ మేఘమూ వర్షించుట లేదు

ఇది మనుషుల ఎడారి

ఎడం ఎడం మనుషుల ఎడారి

ఒంట్లో నిప్పుల వేడి

భరించలేని ఆత్మీయ ఆహాస్పిటాలిటీ

అదుగో ఆక్సీక్రిమేటర్ క్రిమి రెమ్ డిసీవర్

ఈ వలలో ఈవల ఎగ ఊపిరి తుది ఆవిరి

హంస ఎగిరిపోతూ పోతూ –

అదే హంసగీతం మించిన ఫిడేలు వాదనం

మోహన జన సమ్మోహన రాగం

ఒహ్హో నీరో ఆహా నీరో

నువ్వే నా సారో హీరో

ఇది పగటి చీకటి రాత్రి

గుండె పగుళ్ళ రోదనా ధరిత్రి

ఇటనిక ఉండదగదనిపిస్తూ

ఈ బ్రతుకు కటికి చేదనిపిస్తూ

ఏదో అగాథం అంచుకు నెట్టేస్తూ –

ఈ బెడ్ కి, ఆ డాక్టర్ కి, అల్లదుగో ఆ నర్సుకి

కిత్ అండ్ కిన్ కి

బై బై చెప్పుకొని

దోసెడు దుమ్ము నెత్తిమీద చల్లుకొని

నన్ను నేనే మూటగట్టుకుంటూ

నా పార్థివ దేహం నేనే మోసుకుంటూ –

అహో! దుర్భర విషాద మోదం

 

ఒకటి – రెండు – మూడు

వెయ్యి – లక్ష – కోటి

ఎంతెంత దూరం

కోసెడు కోసెడు దూరం

నన్నడగని నా పయనం

తొందర చిందరవందరగా

ఇద్దరి నుంచి అద్దరికి

ఎంతెంత దూరం

ఇంకెంత దూరం

అదుగో అదుగో వైతరణి తీరం

 

(కోవిడ్-19, అంతకు మించి ప్రభుత్వ నిర్లక్ష్యం-2021 తో వెళ్ళిపోయిన మిత్రుడు గొడవర్తి వెంకట సుబ్రహ్మణ్యం తలపులో) 

——-

చిత్రం: రాజశేఖర్ చంద్రం 

పాపినేని శివశంకర్

3 comments

Enable Google Transliteration.(To type in English, press Ctrl+g)

  • గొప్ప స్నేహితునికి ఆత్మీయ ఆవేదనా పూరిత నివాళి .

  • ఒకానొక అరక్షిత ప్రపంచంలో కునారిల్లుతున్న మనిషి హీనస్వరాన్ని తార్కికంగా, తాత్త్వికంగా తూకం వేసిన కవిత. బతుకు మూలాల్లోని డొల్లతనాన్ని హేళన చేసిన కవిత.
    ‘ఆహాస్పిటాలిటీ’, ‘ఆక్సీక్రిమేటర్’ వంటి వైవిధ్య పదబంధాలతో కవితను కొత్త ఎత్తులకు తీసుకెళ్లటం పాపినేని గారి ప్రత్యేక విద్య.

  • అలా అలా చాలామంది వెళ్లిపోతున్నారు. విషాదం ప్లస్ దుర్మార్గం.
    ఆహాస్పిటాలిటీ. రెం డిసీవర్ లాంటి coinage శివశంకర్ లాంటి కొద్దిమంది గొప్ప కవులకే తెలిసిన విద్య..

‘సారంగ’ కోసం మీ రచన పంపే ముందు ఫార్మాటింగ్ ఎలా ఉండాలో ఈ పేజీ లో చూడండి: Saaranga Formatting Guidelines.

పాఠకుల అభిప్రాయాలు