సోషల్ మీడియా – పిల్లలు

ఆస్ట్రేలియా ప్రభుత్వం గత నెల చరిత్రాత్మక నిర్ణయం తీసుకుంది. 16 సంవత్సరాల లోపు పిల్లలు సోషల్ మీడియాను ఉపయోగించడాన్ని నిషేధిస్తూ కఠినమైన చట్టాన్ని ఆమోదించింది. ఈ చట్టం ప్రకారం, సోషల్ మీడియా కంపెనీలు పిల్లల వయసును ధృవీకరించవలసి ఉంటుంది. ఈ నిబంధనలను పాటించని సంస్థలపై 50 మిలియన్ డాలర్ల వరకు జరిమానా విధించే అధికారం ప్రభుత్వానికి ఉంటుంది.

భారతదేశం విషయానికి వస్తే, ప్రపంచంలోనే అత్యధిక యువజన జనాభా కలిగిన దేశంగా ఉన్నది. ‘ లోకల్ సర్కిల్స్ ‘ అనే సంస్థ సేకరించిన గణాంకాల ప్రకారం. ఇక్కడి పరిస్థితి ఆందోళనకరంగా మారింది: పట్టణ ప్రాంతాలలో సగం మంది తల్లిదండ్రులు తమ పిల్లలు సోషల్ మీడియా, ఓటిటి ప్లాట్‌ఫారమ్‌లు మరియు ఆన్‌లైన్ గేమింగ్‌కు బానిసలుగా మారారని ఆందోళన చెందుతున్నారు. దీని వల్ల పిల్లలు ఆక్రమణకారులుగా, అసహనంతో, అతి దూకుడుగా, సోమరులుగా మారుతున్నారు. 47% మంది తల్లిదండ్రులు తమ పిల్లలు రోజుకు సగటున 3 గంటలు లేదా అంతకంటే ఎక్కువ సమయాన్ని సోషల్ మీడియాలో గడుపుతున్నారని పేర్కొన్నారు.  ఈ పరిస్థితులను దృష్టిలో ఉంచుకుని, డాటా ప్రొటెక్షన్ లా ని మరింత కఠినంగా అమలుపరచాలని కోరుకుంటున్నారు. 66% మంది భారతీయులు 18 సంవత్సరాల లోపు పిల్లలు సోషల్ మీడియాలో చేరేటప్పుడు తప్పనిసరిగా తల్లిదండ్రుల అనుమతి తీసుకోవాలని కోరుతున్నారు. ఆధార్ ద్వారా తల్లిదండ్రుల ధృవీకరణను తప్పనిసరి చేయాలని పలువురు డిమాండ్ చేస్తున్నారు.

ఆస్ట్రేలియా ఎలా అమలుచేయబోతున్నది అని చూస్తే ఈ కింది విషయాలు అవగతమవుతాయి:

1.     వయసు ధృవీకరణ ని ఉపయోగించి: బయోమెట్రిక్స్, ప్రవర్తనా సంకేతాలు లేదా డిజిటల్ గుర్తింపు ద్వారా నిర్వహించవచ్చు. ఉదాహరణకు, Yoti వంటి డిజిటల్ గుర్తింపు ప్రొవైడర్లు ఫేస్ రికగ్నిషన్ ఉపయోగించి వయసును అంచనా వేయగలరు. చేతి కదలికలను విశ్లేషించి 99% ఖచ్చితత్వంతో వయసును నిర్ధారించగల AI ఆధారిత వ్యవస్థలు కూడా అందుబాటులోకి వస్తున్నాయి.

2.     క్రమబద్దీకరణను అనుసరించి: డిసెంబర్ 2025 నాటికి పూర్తిస్థాయిలో అమలులోకి రానుంది.

3.     కొన్ని మినహయింపులు ప్రకటించి: మెసేజింగ్ సేవలు, విద్య సంబంధిత వెబ్‌సైట్లు, ఆరోగ్య సమాచార వేదికలు మినహాయించబడతాయి.

4.     సామాజిక స్థితిని దృష్టిలో పెట్టుకుని: LGBTQA+ సమాజం, వైకల్యం ఉన్న వారు వంటి మార్జినలైజ్డ్ సమూహాలకు ప్రత్యామ్నాయ వేదికలు అందించాలి.

భారతదేశం కూడా ఇలాంటి బలమైన చట్టాన్ని రూపొందించి, దాని అమలులో ఆస్ట్రేలియా అనుభవాన్ని ఉపయోగించుకోవాలి. అయితే మన దేశ పరిస్థితులకు అనుగుణంగా మార్పులు చేసుకోవాలి. అదే సమయంలో, పిల్లకి టెక్నాలజీ ఎక్కువ తెలిసి తల్లితండ్రులకి తెలియకపోవటంతొ కూడా పరిస్థిథిని అదుపు చేయలేని స్థితిలో ఉన్నారు. తల్లిదండ్రులకు తమ పిల్లల ఆన్‌లైన్ కార్యకలాపాలను పర్యవేక్షించగలిగేలా డిజిటల్ పేరెంటింగ్‌పై ప్రత్యేక శిక్షణ ఇవ్వడం ఎంతైనా అవసరం అనిపిస్తుంది.. చివరగా, పిల్లలకు సురక్షితమైన ప్రత్యామ్నాయ వేదికలను అభివృద్ధి చేయడం ద్వారా వారు అసురక్షిత ప్లాట్‌ఫారమ్‌లకు మళ్లకుండా చూడవచ్చు. ఇవన్నీ చెయగలిగినప్పుడే డిజిటల్ బధ్రత పెరుగుతుంది.

ఆస్ట్రేలియా ఈ-సేఫ్టీ కమిషనర్ చెప్పినట్లు: “నీటి భద్రతను నియంత్రించినట్లే, ఆన్‌లైన్ భద్రతను కూడా నియంత్రించాలి. స్విమ్మింగ్ పూల్‌లకు కంచె వేసినట్లే, డిజిటల్ ప్రపంచంలో కూడా సురక్షిత హద్దులు ఏర్పరచాలి.”

భారతదేశం ఆస్ట్రేలియా అనుభవం నుండి నేర్చుకుని, మన పరిస్థితులకు అనుగుణంగా ఒక సమగ్ర విధానాన్ని రూపొందించాలి. ఈ విధానం వల్ల తొలి దశలో కొంత ఇబ్బంది ఉన్నప్పటికీ, దీర్ఘకాలంలో యువతరం మానసిక, శారీరక ఆరోగ్యానికి మేలు చేస్తుంది. సోషల్ మీడియా కంపెనీలు కూడా భద్రత విషయంలో పోటీ పడే స్థితి ఏర్పడుతుంది. యువతరం భవిష్యత్తు కోసం ఇలాంటి కఠిన నిర్ణయాలు తీసుకోవడం అవసరం.

*