మరోసారి మరో చిగురాశ!

మొదట మీ అందరికీ ఉగాది శుభాకాంక్షలు!

ఉగాది అంటే పచ్చదనం. మావి చిగురు. కోయిల పాట. ఆ రెండీటిలో ఏది ముందు ఏది వెనక అన్న అందమైన సంశయమూ! చలిని పొడుస్తూ వెచ్చగా పరచుకునే సూర్యుడు. సూర్యుణ్ణి వోడించేయాలని ఆరాటపడే చలి. వొక కొత్తదనమేదో ఇంటింటా అందరినీ పలకరిస్తూ వుంటుంది. జీవితం కొత్త రంగుతోనో, కొత్త శబ్దంతోనో పల్లవించే వేళా విశేషం ఉగాది.

వీటన్నిటికీ ఇప్పుడు మరోసారి సారంగ తోడురాగమవుతోంది. ఏ ప్రారంభమైనా ఆశల చిగురాకులా మిలమిల మెరుస్తుంది. ఆ చిగురాకు  నిండా కలల మెరుపే వుంటుంది. ఆ చిగురుని చూసే కళ్ళల్లో కూడా కొత్త కాంతులీనుతూ వుంటాయి. అది సహజమే! అసలే  కలలూ కనలేకపోవడం కంటే పెద్ద శాపం ఇంకోటేదీ లేదు. కల నిజమవుతుందా లేదా అన్నది తరవాతి సంగతి. ముందు ఆ కలని యెవరూ దోచుకోకుండా కాపాడుకోవాలి. అట్లాంటి సందేశమిచ్చేది అది ఉగాది అయినా పర్లేదు, చిన్న మార్పేదో అయినా పర్లేదు. మార్పు కోసమే ఉగాది. మార్పు కోసమే  ఇప్పుడు ఈ సారంగ !

పోయిన ఏడాది జనవరి మధ్యలో సారంగ  ఇక సెలవు అని ప్రకటించినప్పుడు అది యెవరికీ నచ్చలేదు. చాలా మంది ఇప్పటికీ కోప్పడుతూనే వున్నారు. కొన్ని పత్రికల సాహిత్య పేజీలు సారంగ  మూతని వార్తగా ప్రకటించేంత సంచలనమూ అయింది. గత ఏడాది కాలంగా యెందరో యెన్నో విధాలుగా సారంగ మళ్ళీ మొదలవ్వాలని గట్టిగానే వొత్తిడి చేస్తూ వచ్చారు. కొంత మంది ఆర్థికంగా సాయపడడానికి కూడా ముందుకు వచ్చారు. ఇంకా కొంత మంది మా రెండు చేతులూ  అందిస్తామని సంతోషంగా ముందుకొచ్చారు. వాళ్ళందరికీ ధన్యవాదాలు. సందర్భం వచ్చినప్పుడు మీ సహకారం తప్పక తీసుకుంటాం.

ఈ ఏడాది పాటు నిశ్శబ్దం వల్ల సారంగ లేని లోటుని అందరూ మాట్లాడుతూనే వున్నారు. వేదికల మీద చెప్తూనే వున్నారు. ప్రతి గురువారం క్రమం తప్పక సారంగ విడుదల అవడాన్ని చూస్తూ వచ్చిన మీకు చాలా విషయాలు తెలుసు. సారంగ క్రమ వికాసమూ వాస్తవాలూ కలలూ అన్నీ! మేం ఇంట్లో వున్నా, విదేశాల్లో తిరుగుతూ వున్నా, ప్రతి గురువారం సారంగ మాత్రం మీ ముందు సాక్షరమై నిలిచేది.  అట్లా వారం వారం పత్రిక రావడానికి వెనక యెన్ని చేతుల యెన్నేసి గంటల శ్రమ వుందో మీకు తెలియంది కాదు. ఇవాళ మళ్ళీ సారంగ ని మీ ముందుకు ఇలా తీసుకువస్తున్నామంటే అవన్నీ గుర్తుంచుకునే మొదలు పెడ్తున్నాం. పత్రికా నిర్వహణ  చిన్న బాధ్యత కాదు. కేవలం అయిదారు రచనలు పెట్టి చేతులు తుడుచుకునే వ్యవహారమూ కాదు. ఇదొక ప్రయాణం. ఈ ప్రయాణంలో గతంలోకి తోసేసే గాయపరిచే రాళ్ళూ, పద ముందుకు అని నడిపించే మైలు రాళ్ళూ వుంటాయి. తొవ్వ సరిగా నలగక, శరీరాన్ని సలిపే ముళ్ళూ వుంటాయి. ఆహ్లాదం నింపే పూలూ వుంటాయి. అవన్నీ మేం అనుభవించాం ఖాయంగా! ఇప్పుడు అలాంటి అనుభవం కూడా తోడై, అన్నీ తెలిసే ఈ కొత్త మొదలు!

పోయిన ఏడాది జనవరి పదిహేడున సెలవు ప్రకటించినప్పుడు ఇంకో మాట కూడా అన్నాం. “వచ్చే మార్చి నెలకి మా నిర్ణయం తెలియ జేస్తాం” అని!

ఇదిగో ఇది మార్చి నెల! ఇదిగో ఇది మా నిర్ణయం! కొత్త శీర్షికలతో ముఖ్యంగా మీడియాని సమర్ధంగా నిపుణంగా ఉపయోగించుకోవాలన్న తపనతో మళ్ళీ మీ ముందుకు- కాకపొతే, ఇప్పుడు పక్ష పత్రిక! ఈ మార్పు  కేవలం మా సమయం వెసులుబాటు కోసం! నాలుగు కాలాలు నిలకడగా సారంగ ని మీ ముందుకు తీసుకు రావడం కోసం!

ప్రయోగాత్మకంగా ఇంగ్లీషు సారంగ ని కూడా ఇక  ప్రతి పక్షం రోజులకి ఒక సారి అందిస్తున్నాం. ఇది మా చదువరులకు విశేష కానుక. తెలుగు నుంచి ఇంగ్లీషులోకి విస్తృతంగా అనువాదాలు వెళ్ళాలని, అనువాదాలు లేకపోవడం వల్లనే మన తెలుగు సాహిత్యం వెనకబడి వుందని మనం చాలాకాలంగా బాధపడుతూనే వున్నాం. కాని, అనువాదకులని ఒక వేదిక మీదికి తీసుకువచ్చి, వాళ్ళ మధ్య సంభాషణ మొదలు పెడితే తప్ప అనువాద కృషికి తగినంత బలం దక్కదు. సారంగ ఇంగ్లీషు విభాగం ఈ దిశగా యే కాస్త వుపయోగపడినా అది మాకు కొండంత వెలుగు.

ఇవాళ మీడియా అంటే కేవలం అచ్చు అక్షరమే కాదు, విన్పించే మాట. కన్పించే దృశ్యం కూడా! కాని, సాహిత్యం ఇప్పటికీ అచ్చు అక్షరాలకే పరిమితమై వుండడం వల్ల కొత్త తరానికి అది అంతగా అందడం లేదు. ఇవాళ్టి “చదువరులు” కేవలం “చదువు”కోవడంతోనే తృప్తి పడడం లేదు. దృశ్య శ్రవణ రూపాల్లో కూడా సాహిత్యం వుండాలని కోరుకుంటున్నారు. ఆ దిశగా చాలా కృషి జరగాల్సి వుందని మేం నమ్ముతున్నాం. సారంగ ద్వారా అది ఎంతమేరకు చేయగలమో ఇంకా ఒక స్పష్టత లేదు. ఈ సంచికతో ఛాయ సాహిత్య సంస్థ సహకారంతో అందిస్తున్న వీడియో ఇంటర్వ్యూ అటువైపుగా ఒక అడుగు మాత్రమే. మీ నుంచి లభించే ప్రోత్సాహాన్ని బట్టి ఆ దృశ్య శ్రవణ విభాగాన్ని మరింత మెరుగుపరుస్తాం.

అతితక్కువ వ్యవధిలో అడిగినా తక్షణమే స్పందించి, ఈ సంచికకు రచనలు పంపించిన రచయితలందరికీ, ముఖ్యంగా కాలమిష్టులకు, బొమ్మ సాయం చేసిన చిత్రకారులకు సారంగ కృతజ్ఞతలు. వందల సంఖ్యలో కవితలు పంపిన కవులకు మా ధన్యవాదాలు. అయితే, సారంగ పక్షపత్రిక స్థల కాల పరిమితులని దృష్టిలో వుంచుకొని మాతో సహకరించవలసిందిగా వారికి ప్రత్యేకంగా విన్నపం.

ఈ ఉగాది రోజు మీ ముందుకు వచ్చిన సారంగ ని పది ఉగాది కాలాలపాటు నిలబెట్టుకునే బాధ్యత మీదే ఇక! సారంగ ప్రస్తుతానికి ఇలా వుంది. ఇక ముందు యెలా వుంటే బాగుంటుందో మీ సూచనలు ఎప్పటికప్పుడు చెప్తూ వుండండి.

సారంగ  మీ పత్రిక, మీ వేదిక.

సారంగ మీ గొంతుక, మీ వాహిక!

మీరు తోడై నిలబడితేనే  సారంగ !

*