పక్షుల సభ

ఇంటి ముందు

చెట్టు మీద పక్షుల సభ

తెల్లారు జామున

ఒకటే రభస

ఆ చెట్టు నాటిన వాడికి

ముక్తకంఠంతో జై కొడుతున్నాయి

మనుషులు గడుపుతున్న

అజీవితం గురించి

ఇవాళ చర్చ

ఒక్కోపక్షి

ఈ కాలపు దృశ్యాలను

వణుకుతున్న గొంతుతోచెప్తున్నాయి

అత్యాశల చిటికెన వేలు పట్టుకుని

పరుగెడుతున్న జనం గురించి చర్చిస్తున్నాయ్

కూటికి కులం పూసిన వాడిని తల్చుకుని

విలవిల లాడి పోయాయ్

ఉన్నావ్ బాధితరాలు గుర్తొచ్చి

కిలారింపులు మొదలెట్టాయ్

దేశమంతా

ఒకే రంగు కోసం

ప్రయత్నిస్తున్న ఇద్దరు మిత్రుల్ని తల్చుకుని

పగలబడి నవ్వుకున్నాయి

రెండు మామిడి పండ్ల కథ చెప్పుకుని

ఒక నిమిషం మౌనం పాటించాయ్

కాశ్మీర్అమ్మాయిలు ఆపిల్ లా ఉంటారన్న వాడి

నాలుక గుర్తోచ్చి ముక్కులుతో

కొమ్మల్ని  బలంగాకొట్టాయ్

యుద్దానికి సిద్ధమన్న

నాయకుడి మాటలు జ్ఞప్తికి తెచ్చుకున్నాయి

లోకంలో జరిగిన యుద్దాలు తెలుసు అంటూ

చరిత్ర చదివిన పక్షి ఒకటి

కన్నీటి గింజలు రాల్చింది

ఈ భూమ్మీద

యుద్ధం

అత్యంత నీచమైన మాట అంటూ

పక్షులు ఒక్కసారిగా

దిక్కులు పిక్కటిల్లేలా

ఆకాశం వైపు ఎగిరాయి.

*