కాళ్ళకూరి శైలజ కవితలు రెండు

*

తన కవిత్వ ప్రయాణం గురించి శైలజ మాటల్లో-

“పాఠ్యపుస్తకాల తో పాటు కవిత్వం చదువుకుని,విశ్లేషించుకోవడం అలవాటు.ఒక వాక్యం ఛందో వ్యాకరణ వర్ణనలతో  ప్రయోగించే ప్రక్రియ మాత్రమే కాదు. అది మనల్ని వెంటాడే తీరులో దాని విలువ ఉందని నమ్మకం.

మనిషి తోటి వారితో విభేదించడం సహజం.కానీ అది వేర్పాటు వాదమైతే జరిగేది యుద్ధం.ప్రకృతి లో భాగమైన మనిషి కృతకంగా మారుతున్న వైనం పట్ల బాధ. ఆధునికత పేరుతో సాంకేతిక పరిజ్ఞానం ఒక్కటే ఆసరాగా జీవిస్తూ అనుభూతిని వదులుకున్న కొత్త తరం గురించి ఆందోళన. ఈ నేపథ్యంలో కవిత్వం వ్రాస్తూనే,వివిధ దిన పత్రికల్లో,వెబ్ మాగజైన్స్లో ,’కవిత’ పుస్తకంలో కవితలు ప్రచురించబడ్డాయి. ‘కొంగలు గూటికి చేరిన వేళ” గా తొలి కవితా సంపుటి ‘ అనల్ప’ ప్రచురణ సంస్థ ద్వారా వచ్చింది. కవిత్వ మార్గంలో వాక్య నిర్మాణానికి సంబంధించి ఎందరో సహృదయుల సూచనలు ప్రోత్సాహం మరువలేనివి. మాయమౌతున్న మానవ సంబంధాలను కళ్ళకు కట్టి, ఆ మాధుర్యాన్ని అందించాలనే ఆకాంక్ష తో కవిత్వం వ్రాస్తున్నాను. “

మాటలే కవితలై పొంగుతాయి.

చీకటి పేరుకున్న మనసు

హాయిగా ఎలా ఏడవాలో

స్థిరంగా ఎందుకు నవ్వాలో నేర్చుకుంటుంది.

ఏభై ఆరు బలపాలతో

ఏ పదాలు దిద్దుకోవాలో

ఏ వాక్యాలు దాచుకోవాలో

తెలిపే క్షణాలు ఒకేసారి విరబూస్తాయి.

సాటి మనిషిని మోసం చేసే

మేధో చౌర్యం బయటపడి,

ఆరాధించే వ్యక్తుల అహంకారం

ముసుగు తీసిన చిత్రమై ఎదురుపడుతుంది.

కష్టాలు, బాధలూ చుట్టుముట్టినా,

ఓటమి తుఫాను అస్తిత్వాన్ని కూల్చినా

నిప్పు రవ్వలై విరజిమ్మే

భయం లేని మాటల్ని

పరిచయం చేస్తుంది.

సూర్యుడు అస్తమిస్తుంటే

మరిన్ని కెరటాలై పొంగే సముద్రం లా

జీవితం కొత్త ఉత్సాహాన్ని అందిపుచ్చుకుంటుంది.

మంచి పుస్తకం లాంటి  మనుషుల్ని కలుసుకుంటే,

నాన్న కష్టంతో కొన్న  పుస్తకం తెరిచినప్పటి,

కొత్త పేజీల వాసన గుర్తుకొస్తుంది.

ముందు పేజీలో నా పేరు వ్రాసిన అమ్మ దస్తూరీలా

నిటారుగా నిలబడే బలం వస్తుంది.