ఇష్క్,ప్యార్,మొహబ్బత్

1

నెలవంక
సముద్రమూ
పక్షులూ
నేనూ
వొంటరులమే-

నువ్వు తోడు లేనంతవరకు

2

ఎడబాటును మోస్తూ మోస్తూ
పొద్దుట్నుంచీ గాలి వీస్తోంది బరువుగా

నీ గొంతు వినగానే
రెక్కలు కదిలాయి చూడు

ప్రేమ అని అంటారు కానీ
పునర్జననం నిజానికి

3

లోలోపల అల్లుకుపోయి
తిరిగి తిరిగి చివురులెత్తే
వేర్ల పేరే ప్రేమ

మనసుది క్షేత్రస్వభావం

4

ఇన్నిన్ని
ఒడుదుడుకులు దాటుతూ
విసిగి వేసారినా
అడుగుల్ని కదిపే జీవితేచ్ఛ
ప్రేమకాక మరేమిటీ?

5

“మనం బైట చూడగోరే వింతలన్ని
మనలోనే మోసుకొని తిరుగుతూ ఉంటాం”
అంటాడు రూమి!
ప్రేమ-
మనిషిని మరో మనిషిగా మార్చి మార్చి
జీవితమంతా గిరగిరా తిప్పుతూనే ఉంటుంది.

6

పిల్లలతో
భలే ఆనందంగా ఆడుకుంటున్నావు చూడు
పువ్వులమధ్య
నువ్వో పువ్వులా మారిపోయావు చూడు
నవ్వుల్లో నవ్వుగా
పరిమళిస్తున్నావు చూడు

నువ్విప్పుడు
ప్రేమను తొడుక్కున్న దేహంతో
ప్రకాశిస్తున్నావు అందంగా.

7

ప్రేమకు
సార్వజనీన నిర్వచనం
ఉంటుందా

ఒక్కొక్కరూ
ఒక ప్రపంచం కదూ!

*

చిత్రం: రాజశేఖర్ చంద్రం