అవునా?

అది

నీ ఎదుట నిలబడుతుంది!

నీ సిగ్గును చిదిమేసి..

వివస్త్రుడిగా నిన్ను నీకు చూపిస్తుంది!

నీ మానాన్ని అడుక్కంటా తొక్కి..

నిర్లజ్జాంకితుడిగా నిన్ను నీకు పరిచయం చేస్తుంది!

గొడ్డలివేటుతో అహంకారాన్ని నరికేసి..

వెంపలి చెట్టుకు నిచ్చెన వేయగలిగిన

కుబ్జరూపుడిగా నిన్ను,

నీ పాదాలవద్దనే నిలబెడుతుంది!

ఆ దెబ్బకు స్వాభిమానం మ్లానమై,

ఆత్మశోధనాత్మకమైన గ్లాని..

నీ నరాలలో ప్రవాహమై,

నీ కండరాలలో నివాసమై,

నీ దేహగుణాన్ని దిగనాసిల్లజేస్తుంది!

ఆ ధాటికి ఆత్మవిశ్వాసం మాయమై,

అదృశ్యగా మిగిలిన గాయం..

నీ బుద్ధిలో చెదపురుగై,

నీ ఆలోచనలో విషబిందువై,

నీ ఆత్మగుణాన్ని హననం చేసేస్తుంది!

అప్పుడిక నువ్వు,

నిన్ను నీలోంచి మైనస్ చేసుకున్న నువ్వు,

కాష్టంలో ఉద్భవించిన భస్మదేహుడిలాగా ,

లేచి నిల్చుంటావు!

వ్యభిచారాత్మక నవ్వు ఒకటి తొడుక్కుంటావు..

వంచనాత్మక మాటల సంచయాన్ని అవధరిస్తావు..

దోసిలొగ్గుతావు.. జోలె పడతావు!

==

తెలిసిపోయింది లే..

దానిపేరు ‘డబ్బు’ కదా.. అంటావు నువ్వు,

విజయహాసపు చారు వీక్షణలతో!

అవునా.. ‘అవసరం’ అనుకున్నానే..

రుంజుకుంటాను నేను!!

*