జలగల వాన

     ఆషాఢపు గాలి కొండపూల పరిమళంలో
     దూరి అక్కడ మంచు శిలలుగా గడ్డకట్టింది.
     దక్షిణం నుంచి వీచిన నిర్బంధపవనాల
    సవ్వడి శిలలను పొలమార్చింది.
       ఇక ఆ కొండల నేల
       వికృత రుతువుల్ని కలగంటుంది.
    ఈసారి ఆ దారులన్నీ మరింత ముళ్లబారవచ్చు
   ఈసారి ఆ గాలి మరింత  దట్టమవవచ్చు
   గంధకపు కేకలు యిమిడి యిమిడి గాలి కూడా
    నిరసనల పొగబారవచ్చు.
     ఇక ఆ నేలతలం చదునుగా కాదు
               గరుకుగా కాదు
      బాయ్నెట్ లా నిలబడవచ్చు.
     ఆ నేల కొమ్మ రూపం మారి
     చురకత్తి అంచుగానో తుపాకీగానో
    రక్తం రుచిమరిగిన సైనిక హైనా గానో మారిన
     మనిషి భావాల్ని పరకాయప్రవేశం చేస్తుంది.
     పండ్లన్నీ రక్తం అంటిన
     పావురపు దేహంగా మారిపోతాయి.
    ఆ కొండల నేల అణువణువూ
    అంతర్జ్వలన రూపమెత్తుతుంది
    ఘర్షణ బయట గాదు లోపలికి పోటెత్తే
     క్రతువొకటి శీఘ్రమవుతుంది.
      ఇక అక్కడ నేల రాలే యిసుకరేణువులు
     పెల్లెట్లై మైదానంలో పడతాయి
      ఒక అధ్భతం జరిగి చేపలవాన కురిసినట్టు
      కత్తులకొసలు కురుస్తాయి.
        ఇదంతా వాస్తవం కాకపోవచ్చు
        జరగక పోయినంత మాత్రాన
         వూహకు చోటులేకుండా పోదు.
        ఒక నిశ్శబ్ద శాపం జలగల వానలా
        మీద పడకుండా పోదు.
        ఇంకా ఆ అరణ్యకాల్లో యేం రాసుందంటే!
       ఇక ఆ కొండల మీద కురిసే వాన
       నేరుగా మన ముంగిటే నట.
       వాన కురవడమంటే
       తడిచినుకుల జడిలా కాదు
      ఇంత వరకు మనం చూపిన
        పొడి ప్రతిస్పందనల రావడిలా.
        తలుపులు మూసి మనమిచ్చిన తీర్పు
       మన మీదే పునరావృతం అయ్యేలా.
         నీమీద యేదైనా కురవడమంటే
          నువ్వు యితరులకు యిచ్చిందే
          అని అర్థం కదా!?
*
painting: pathan mastan khan

వెంకట కృష్ణ

ఇంటర్మీడియట్ చదివే రోజులనుండి కవిత్వం రాస్తున్నా.నా తరం అందరిలాగే శ్రీశ్రీ ప్రభావం నామీదుంది.అయితే పుస్తకాలు చదివే అలవాటు వల్ల రా.వి.శాస్త్రి రుక్కులూ, రంగనాయకమ్మ బలిపీఠం హైస్కూల్ దినాలకే చదివున్నాను.యండమూరీ,చందూసోంబాబు,తదితర కమర్షియల్ సాహిత్యం కూడా ఇంటర్ రోజుల్లో విపరీతంగా చదివున్నా సీరియస్ తెలుగు సాహిత్యం తోనే నా ప్రయాణం కొనసాగింది.1994 నవంబర్ నెలలో మొదటి కథ ఆంధ్ర ప్రభ సచిత్ర వారపత్రికలో అచ్చైంది . అప్పటిదాకా రాసుకున్న అచ్చు కాని కవిత్వాన్ని 2000 సంవత్సరం లో లో గొంతుక గా నా మొదటి కవితా సంపుటి.1994నుండీ 2000 దాకా నెమ్మదిగా రాసాను.2000 తర్వాత రెగ్యులర్ గా రాస్తున్నా.

1 comment

Leave a Reply to Madur Pragathi Cancel reply

Enable Google Transliteration.(To type in English, press Ctrl+g)

  • నీమీద యేదైనా కురవడమంటే
    నువ్వు యితరులకు యిచ్చిందే
    అని అర్థం – బాగుంది సర్

‘సారంగ’ కోసం మీ రచన పంపే ముందు ఫార్మాటింగ్ ఎలా ఉండాలో ఈ పేజీ లో చూడండి: Saaranga Formatting Guidelines.

పాఠకుల అభిప్రాయాలు